Араматычныя свечкі такія ж шкодныя, як выхлапныя газы аўтамабіляў
Калі гаворка заходзіць пра забруджванне паветра, большасць людзей уяўляе сабе выхлапныя газы аўто, заводскія трубы ці вялікую сметніцу ў межах горада. Але новае даследаванне паказвае, што значныя крыніцы забруджвання могуць знаходзіцца проста ў вашым доме.
Навукоўцы з ЗША высветлілі, што араматычныя прадукты, такія як воскавыя палоскі і араматычныя безагнявыя свечкі, могуць быць гэтак жа шкоднымі, як і традыцыйныя крыніцы забруджвання, якія мы звыкла ўспрымаем як небяспечныя, перадае партал New Atlas.
Паводле даследавання, награванне араматычных воскаў прыводзіць да ўзаемадзеяння тэрпенаў (арганічных злучэнняў, якія адказваюць за водары раслін і спецый) з азонам у памяшканні, у выніку чаго ў паветры з’яўляюцца наначасціцы, здольныя пранікаць глыбока ў лёгкія і нават трапляць у кроў.
Вынікі аналізу паказалі, што спальванне адной арамасвечкі на працягу 5 хвілін можа ўтварыць да аднаго мільёна такіх наначасціц на кубічны сантыметр паветра, што супастаўна з узроўнем, які выпрацоўваецца газавымі плітамі ці дызельнымі рухавікамі. Прычым выкарыстанне неараматычных свечак не выклікала такой рэакцыі.
«Адной з найбольш небяспечных характарыстык наначасціц, якія ўтвараюцца пры выкарыстанні араматычных свечак, з’яўляецца іх здольнасць глыбока пранікаць у дыхальную сістэму. Навукоўцы адзначаюць, што большасць часціц памерам менш за 100 нанаметраў застаюцца ў верхніх дыхальных шляхах, але некаторыя могуць трапляць у кроў і дасягаць унутраных органаў, у тым ліку галаўнога мозгу, прыводзячы да развіцця розных захворванняў, такіх як астма, інсульт, кагнітыўныя расстройствы і гэтак далей.
Падобныя эфекты назіраюцца і пры працяглым уздзеянні забруджанага паветра з транспартных выхлапаў, што даказана шматлікімі даследаваннямі пра ўплыў гарадскога смогу на здароўе людзей», — падкрэсліваюць навукоўцы.
Асаблівасці ўздзеяння гэтых наначасціц на арганізм чалавека пакуль застаюцца не да канца вывучанымі, але ўжо зараз можна казаць, што выкарыстанне араматычных свечак і воскаў варта разглядаць як актыўную крыніцу хімічных змен у паветры жылых памяшканняў. У адрозненне ад выхлапных газаў, якія, хоць і шкодзяць, але паступова выводзяцца вятрамі і атмасфернымі ападкамі, араматычныя прадукты дрэнна выветрываюцца і ўплываюць непасрэдна на тых, хто знаходзіцца ў памяшканні.
Улічваючы ўсё гэта, навукоўцы раяць знайсці больш бяспечныя спосабы паляпшэння паветра ў памяшканні: частае натуральнае праветрыванне, умеранае выкарыстанне дыфузараў з натуральнымі эфірнымі алеямі (напрыклад, лаванда, чайнае дрэва, мята) ці выкарыстанне прыродных пахаў без спальвання і хімікатаў (сухія травы, кветкі, цытрусавыя лупіны, карыца, ваніль).
Цяпер чытаюць
Лукашэнка паказаўся ў Амане толькі на чацвёрты дзень візіту — дома ў султана. З ім Віктар і Коля12
Каментары