Астраномы адкрылі новы астэроід. А пасля аказалася, што гэта аўтамабіль, які лятае ў космасе
Новаму нябеснаму целу ўжо паспелі даць імя і ўнесці ў афіцыйны каталог, але потым знаходку тэрмінова прыбралі, што збіла з панталыку астранамічную супольнасць.
У пачатку студзеня турэцкі астраном выявіў паблізу Зямлі новае нябеснае цела, якое было прынята за астэроід і потым афіцыйна ўнесена ў каталог аўтарытэтнага Гарвард-Смітсанаўскага цэнтра астрафізікі ў Кембрыджы. Аб'ект на адлегласці 240 тысяч км ад Зямлі — што бліжэй да нас, чым Месяц — атрымаў назву 2018 CN41.
Аднак праз усяго некалькі гадзін пасля занясення ў каталог было абвешчана аб выдаленні запісу, піша выданне Newsweek.
«Астэроідам» аказаўся асабісты чырвоны кабрыялет мільярдэра Ілана Маска, мадэль Tesla Roadster, які разам з манекенам у скафандры быў запушчаны на ракеце Falcon Heavy у космас у пачатку 2018 года.
Сам кабрыялет, па падліках навукоўцаў, наўрад ці ўпадзе на Зямлю (шанец — 6%), але калі і ўпадзе, то толькі праз некалькі мільёнаў гадоў, а пры падзенні з высокай верагоднасцю цалкам згарыць у атмасферы.
Прыняцце аўтамабіля Ілана Маска за рэальны астэроід хоць і пазабаўляла астраномаў, але ізноў уздымае праблему высокай забруджанасці арбіты Зямлі рознымі штучнымі аб'ектамі (фрагменты касмічных ракет, старыя ці знішчаныя спадарожнікі, ашчэпкі ад сутыкненняў паміж усімі імі і гэтак далей).
Гэта можа збіваць з панталыку астранамічную супольнасць пры вызначэнні рэальных ці патэнцыйных пагроз планеце, асабліва ўлічваючы тое, што на Зямлі дагэтуль не існуе адзінага цэнтра інфармавання пра ўсе штучныя аб'екты ў космасе, адзначаюць навукоўцы.
Цяпер чытаюць
Гэтая беларуская інстазорка дайшла да Playboy — але, у адрозненне ад многіх, не спынілася2
Каментары