Расійскі тыктокер, які раздражняў беларусаў, паляцеў з Мінска. Шчаслівы, бо змог паскандаліць у аэрапорце з «Белавія»
Расійскі блогер-мільённік Азамат Айталіеў нарэшце з'ехаў з Беларусі. Але без скандалу ў аэрапорце не абышлося. Супрацоўнікаў «Белавія» ён таксама вырашыў павучыць працаваць.
Нагадаем: расійскі тыкток-блогер казахскага паходжання Азамат Айталіеў, які мае больш за 2,6 мільёна падпісчыкаў, прылятаў у Мінск. Рабіў што звычайна: танчыў і наведваў рэстараны, дзе ладзіў выпрабаванні для нервовай сістэмы афіцыянтаў і адміністратараў. Знайшоў ён час і для таго, каб на фоне Палаца Незалежнасці пахваліць Аляксандра Лукашэнку.
Нарэшце Азамат паведаміў, што адлятае з Беларусі. Мінскі аэрапорт чамусьці вельмі развесяліў мужчыну. Ён круціўся і радаваўся як дзіця, што знаходзіцца там адзін.
— Я абяцаю, што зноў прылячу сюды. Чаму? Бо мне вельмі спадабаўся Мінск. Таму чакайце праз 15 дзён. Ненадоўга я з'ехаў.
Дарэчы, пад ролікам хапае каментарыяў на тэму таго, што расійскаму блогеру не трэба спяшацца. Сам ён раней запісаў адказ хэйтарам:
— Я бачу шмат хэйту. Усе зараз як пачнуць пісаць: «Не прыязджай сюды». Але я ў вас пытаць не буду.
Трэба прызнаць той факт, што свае фанаты ў Азамата ў Беларусі ёсць. Калі блогер выходзіў з зоны дагляду, за ім ішла супрацоўніца аэрапорта, якая шчыра пасміхалася.
— Вось як мяне праводзяць, каб я хутчэй з’ехаў, — жартаваў Азамат.
Дзяўчына ж пачала яго пераконваць:
— Мы рады вас бачыць у аэрапорце і ў горадзе!
Каб перакананні былі больш шчырымі, яна літаральна кінулася яму на шыю і абняла.
Бізнэс-зала Азамату не вельмі спадабалася:
— Першы раз бачу такую бізнэс-залу. Яна як сталовая!
Ад ежы, якую прапаноўваюць заможным вандроўнікам, блогер застаўся не ў захапленні.
Нарэшце ў мужчыны з’явілася нагода ўчыніць паўнавартасны скандал. Рэч у тым, што «Белавія» затрымлівала вылет. Сітуацыя, безумоўна, непрыемная, але не сказаць каб надта арыгінальная.
Супрацоўніца аэрапорта спрабавала растлумачыць прычыну блогеру, які размаўляў не вельмі тактоўна. Самалёт, якім ён павінен быў ляцець у Маскву, вылецеў з Ташкента пазней, чым планавалася. Зразумела, што і ў Мінск борт прыбыў пазней за расклад, а яго яшчэ трэба было падрыхтаваць да новага палёту — як мінімум, заправіць, агледзець, прыбраць. Але ж папулярнага расійскага блогера такое тлумачэнне не задаволіла.
— Гэта ўсё робіцца за дваццаць хвілін!
— Вы ведаеце, колькі гэта ўсё робіцца? — чуваць, як складана трымаць сябе ў руках супрацоўніцы аэрапорта.
Азамат абурыўся на камеру з-за жудаснага стаўлення авіякампаніі і патрабаваў кіраўніцтва.
— Ды нам на*ць! Павінны адразу пасадзіць. Што за адносіны? Ну грошы тады плаціце. Як грошы, дык адразу цішыня.
Пры гэтым блогер смяяўся і казаў, што хоча скандал «хаця б недзе».
У наступным відэа з'явіўся супрацоўнік «Белавія, які сказаў, што рэйс з Ташкента быў спецыфічным, але робіцца ўсё магчымае, каб самалёт паляцеў як мага хутчэй. Бачна, што людзі побач злуюцца, але Азамат сярод самых агрэсіўных пасажыраў.
— Скандал нарэшце я зрабіў, — пасміхаўся блогер. — Калі шчыра, гэта жахлівая кампанія.
Праз дзве гадзіны Азамат усё ж сеў у самалёт, шалёна задаволены тым, што атрымалася паскандаліць. Ён загадзя спадзяваўся паскандаліць і на борце. І сапраўды, ледзь зайшоўшы ўнутр самалёта, пачаў выказваць прэтэнзіі за затрымку рэйса сцюардэсе. Яна намагалася яшчэ раз растлумачыць, што самалёт быў тэхнічна не гатовы да палёту. Але Азамат працягваў высвятляць адносіны.
— Спадзяюся, я не спазнюся, але ж ролік зняў.
Ва ўсіх размовах Азамат гучна кажа, што праз затрымку можа не паспець на наступны самалёт, але для падпісчыкаў тлумачыць, што спецыяльна браў квіткі з розніцай паміж рэйсамі ў 5 гадзін, то-бок 2 гадзіны затрымкі для яго не з'яўляюцца крытычнымі.
У выніку Айталіеў сапраўды паспеў на свой рэйс з Расіі ў Казахстан і нават паспеў паснедаць і ў бізнэс-залі «Шарамеццева».
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»
Расійскі блогер сыграў у S.T.A.L.K.E.R.2 і выразаў літару Z на забітым персанажы
Z-блогер «Трынаццаты», які крытыкаваў Мінабароны і Крэмль, замест суда паедзе на вайну
Дзім Дзімыча не ўзялі ў лукашэнкаўскую «Белую Русь»
Польшча прызнала Аляксандра Машэнскага непажаданай асобай27
Каментары