Новыя вывескі напужалі мясцовых жыхароў.
У сацсетках заўважылі, што Нарвскую шашу, галоўную вуліцу горада, захапілі шматлікія ўстановы з рускамоўнай рэкламай. Гэта самае сэрца сталіцы, за некалькі крокаў ад Старога горада.
«Пицца Ареццо», «Китайская кухня», «Туристическое агентство», «Бюро путешествий», «Вино Вино», банк «Кравченко и партнёры», студыя прыгажосці «Весна», аптэка «Миронов» — такія надпісы цяпер красуюцца на фасадах дамоў у Таліне.
Побач бістро «Беларусь», а ў вокнах рэклама вялікай беларускай крамы бытавой тэхнікі, якая абяцае велізарныя зніжкі. Дый саму Нарвскую шашу перайменавалі — на аншлагах яна стала называцца вуліцай Ткалава.
Вядома, пераўвасабленне Таліна ва ўмоўны Мінск звязана з тым, што ў горадзе праходзяць здымкі.
«Уявіце рэакцыю людзей, якія не ў курсе здымкаў. Вырашаць, што нас захапілі», — жартуюць мясцовыя жыхары.
Восенню ў Эстоніі пачаліся здымкі новага амерыканскага серыяла «Агенцтва» (The Agency) ў жанры шпіёнскага трылера. Серыял здымаюць студыі Paramount+ і Showtime. Прадзюсарамі выступілі Джордж Клуні і Грант Хеслаў, галоўную ролю сыграе Майкл Фасбендэр, таксама ў серыяле з'явяцца такія зоркі як Джэфры Райт і Рычард Гір.
Серыял заснаваны на французскім серыяле «Бюро легенд» (Le Bureau des Légendes), які выходзіў на Canal+ з 2015 па 2020 год.
Дзеянне серыяла разгортваецца ў аддзеле, які адказвае за падрыхтоўку агентаў пад глыбокім прыкрыццём, якія выконваюць працяглыя разведвальныя заданні і гадамі жывуць пад чужой маскай.
Вядома, Беларусь, якая ў апошнія гады ператварылася ў «шэрую зону» Еўропы і варожую да Захаду краіну, ідэальна пасуе для шпіёнскіх прыгод. Раней у такой якасці часта выступалі посткамуністычныя Балканы.
У Эстоніі, як і ў іншых краінах, дзейнічае праграма падтрымкі здымак замежных кінапраектаў на яе тэрыторыі. У рамках такой праграмы кампенсуецца 20-30% выдаткаў на здымкі. Краіна нічога не страчвае, бо грошы ў куды большым аб'ёме вяртаюцца ў бюджэт у выглядзе падаткаў і іншых выдаткаў кінастудыі.
Шырока пра Талін як добрае месца для здымак у свеце даведаліся пасля фільма «Tenet» Крыстафера Нолана. На магістральнай вуліца Лаагна ў спальным раёне Ласнамяэ была знята сцэна пагоні для гэтага фільма.
Беларусь жа сёння ператварылася не ў выгоднае месца для галівудскіх праектаў, а ў дармовую базу для расійскіх кіношнікаў.
Цяпер чытаюць
Ціханоўскі: Лукашэнку трэба судзіць па лукашысцкіх законах, але пасадзіць на кол6
Каментары