Расійскую «Соту», якая мочыць Ціханоўскую, спансіруе алігарх Неўзлін
«Сота» называе «інфармацыю пра ўплыў аднаго са спонсараў» хлуслівай.
Фонд па барацьбе з карупцыяй Аляксея Навальнага выпусціў расследаванне, прысвечанае асобе расійскага мультымільянера Леаніда Неўзліна. Яшчэ з 1990-х ён быў правай рукой Міхаіла Хадаркоўскага. У Расіі яго прысудзілі да пажыццёвага зняволення — нібыта за арганізацыю забойстваў. Неўзлін жыве ў Ізраілі і спрабуе ўплываць на палітыку на постсавецкай прасторы. Цяпер жа, як сцвярджае каманда Навальнага, Неўзлін арганізаваў нападзенне на расійскага палітыка Леаніда Волкава.
Чытайце: Расійскі мультымільянер Неўзлін мог быць арганізатарам нападу ў Вільні на Леаніда Волкава, паплечніка Навальнага
Сярод іншага расследавальнікі згадалі СМІ, падкантрольныя Леаніду Неўзліну. [Інфарматар расказаў], «якіх менавіта журналістаў Неўзлін сабе скупіў, пра яго кішэнную Sota Project — гэта такі тэлеграм-канал-памыйка, які, здаецца, існуе толькі для таго, каб мачыць Фонд па барацьбе з карупцыяй», — расказвае вядучая Марыя Пеўчых.
Адметнасць сітуацыі ў тым, што Sota Project — бадай адзіны папулярны расійскі СМІ, які актыўна і паслядоўна асвятляе беларускі парадак дня. Прычым рыторыка выдання відавочная — мэтанакіраванае змаганне са Святланай Ціханоўскай і спробы дыскрэдытаваць яе. Тэлеграм-канал стаў голасам апанентаў лідаркі беларускай апазіцыі.
Гарачая стадыя пачалася пасля таго, як спецыяльным карэспандэнтам выдання стала блогерка Бэла Фокс, зацяты крытык Ціханоўскай.
На старонках Sota Project дастаецца і «Нашай Ніве», і «Зеркалу». Спачатку незалежныя беларускія выданні называліся «падкантрольнымі Ціханоўскай», цяпер абраная іншая, больш мяккая фармулёўка, «лаяльныя Ціханоўскай».
А ў чым пазіцыя самога Неўзліна па Беларусі? Ён перакананы, што падчас пратэстаў-2020 апазіцыі трэба было падрыхтаваць людзей са зброяй і інфільтраваць іх у натоўп. Тады б, на думку расійскага мільянера, пратэстоўцы змаглі ўвайсці ў прэзідэнцкі палац і ўзяць уладу ў рукі. А вось Ціханоўскую і яе кабінет Неўзлін лічыў няздатнымі для рэалізацыі сілавога сцэнару. У гэтым і можна бачыць асноўную прычыну яго — і падкантрольнай яму Sota Project — зацятай крытыкі Ціханоўскай.
Sota Project адрэагавала на расследаванне Фонда па барацьбе з карупцыяй. У допісе ў тэлеграм-канале сувязь з Неўзліным не адмаўляецца, але «ў чарговы раз фіксуецца факт распаўсюду хлуслівай інфармацыі пра ўплыў аднаго са спонсараў на працу рэдакцыі».
Цяпер чытаюць
Былы міністр культуры Руслан Чарнецкі знайшоў сабе падпрацоўку8
Каментары