Заснавальнік WikiLeaks Джуліян Асанж прызнаў у амерыканскім судзе віну ў разгалашэнні вайсковых сакрэтаў, пасля чаго, згодна з дасягнутымі раней з уладамі ЗША дамоўленасцямі, быў вызвалены.
Пасяджэнне праходзіла ў Федэральным акруговым судзе на востраве Сайпан у Ціхім акіяне (тэрыторыя ЗША), куды Асанж прыбыў з Лондана, піша BBC.
Пасля прызнання віны ў змове з мэтай атрымання і выдавання сакрэтных звестак аб нацыянальнай абароне суддзя Рамона Манглона заявіла, што будзе «справядлівым і разумным» залічыць у якасці тэрміну пакарання 62 месяцы, якія Асанж правёў у лонданскай турме строгага рэжыму «Белмарш», аспрэчваючы экстрадыцыю ў ЗША.
Больш сурʼёзныя абвінавачванні, якія пагражалі доўгім турэмным тэрмінам, з Асанжа былі знятыя.
«Вы зможаце выйсці з гэтай залы суда свабодным чалавекам», — сказала суддзя пасля заканчэння пасяджэння.
Справа супраць Асанжа спыненая, амерыканскія ўлады таксама адклікалі свой запыт аб экстрадыцыі.
Астраўная тэрыторыя для ўгоды была абраная не выпадкова — як гаварылася ў судовых дакументах, Асанж не хацеў прызнаваць віну на кантыненце, акрамя таго, востраў Сайпан знаходзіцца адносна недалёка (3200 км) ад Аўстраліі, куды цяпер адправіцца заснавальнік WikiLeaks.
У найбліжэйшы час Асанж вылеціць у аўстралійскую сталіцу Канберу.
Цяпер чытаюць
Пальчыс, Андрэева, Лойка і іншыя імёны — пасля візіту амерыканскіх дыпламатаў у Мінск вызвалілі 250 палітвязняў13
Каментары