У Пінскім раёне малады мужчына загінуў ад выбуху боепрыпасу часоў Другой сусветнай вайны
У Пінскім раёне следчыя высвятляюць абставіны гібелі 28‑гадовага жыхара аграгарадка Пароханск, які загінуў у выніку выбуху боепрыпасу часоў Другой сусветнай вайны.
Як паведамілі ў Следчым камітэце, мужчына захапляўся пошукам артэфактаў ваеннага часу. Паводле інфармацыі следства, асаблівую цікавасць ён праяўляў да выбухованебяспечных прадметаў, а знойдзеныя боепрыпасы прыносіў да сябе ў двор.
Увечары 26 ліпеня суседзі пачулі гукі ўдараў па метале. Праз некаторы час адбыўся выбух.
Ад атрыманых траўмаў мужчына загінуў на месцы. Медыкі, якія прыбылі па выкліку, толькі канстатавалі смерць.
На месцы здарэння працавала следча-аператыўная група. Падчас агляду былі выяўленыя аскепкі выбухнулага боепрыпасу, гільзы і элементы мін. Для вызначэння тыпу выбуховай прылады і прычын яе дэтанацыі прызначаныя адпаведныя экспертызы. Праверка па факце здарэння працягваецца.
Спецыялісты нагадваюць, што нават праз больш як 80 гадоў пасля заканчэння Другой сусветнай вайны на тэрыторыі Беларусі рэгулярна знаходзяць неразарваныя боепрыпасы. Іх выяўляюць падчас сельскагаспадарчых работ, будаўніцтва, пошукавых экспедыцый, а таксама ў лясах і на палях.
Ратавальнікі і сапёры падкрэсліваюць, што любыя снарады, міны, гранаты ці іншыя падазроныя металічныя прадметы могуць заставацца смяротна небяспечнымі незалежна ад таго, колькі гадоў яны праляжалі ў зямлі.
Пры выяўленні такіх знаходак неабходна не чапаць і не перамяшчаць іх, не спрабаваць разбіраць самастойна, адысці на бяспечную адлегласць і паведаміць пра знаходку ў экстраныя службы па тэлефонах 101 або 102.
Нават моцна праржавелыя боепрыпасы могуць выбухнуць ад удару, нагрэву або спробы іх разабраць. Таму ўсе работы з такімі прадметамі павінны выконваць выключна спецыялісты-сапёры.
Цяпер чытаюць
«На такую х**ню павялася». Расіянка прыехала з Сібіры ў Беларусь і цяпер з мацюкамі расказвае, як тут складана жыць22
Каментары