У Расіі пацвердзілі, што наўмысна абстралялі гіпермаркет у Харкаве. Там загінулі 12 чалавек
Колькасць загінулых у выніку ўдару па гіпермаркеце «Эпіцэнтр» у Харкаве вырасла да 12, 43 чалавекі паранены. Расія прызнала ўдары па Харкаве.
Колькасць загінулых у выніку авіяўдару па будаўнічым гіпермаркеце «Эпіцэнтр вырасла да 12, з іх 10 яшчэ не апазнаныя. Раненні атрымалі 43 чалавекі.
Ад ракетнага ўдару па цэнтры горада, які адбыўся праз некалькі гадзін, пацярпелі 25 чалавек, сярод іх 14-гадовы юнак.
Усяго за суткі ў выніку расійскіх удараў па Харкаву былі параненыя 68 чалавек, сказана ў паведамленні пракуратуры. Даныя будуць абнаўляцца.
Расійскія СМІ са спасылкай на «сілавыя структуры» прызналі ўдар па Харкаве. Яны заяўляюць, што ў гандлёвым цэнтры ўкраінскія вайскоўцы «зладзілі вайсковы склад», які быў выяўлены расійскай выведкай.
«У Харкаве знішчаны вайсковы склад УСУ, размешчаны ў гандлёвым цэнтры», — напісаў ТАСС са спасылкай на сілавыя структуры.
Днём 25 мая расійскія войскі нанеслі ўдар па цывільнай забудове Харкава. Адзін удар прыйшоўся па будаўнічым гіпермаркеце, яшчэ адзін — па парку.
Каментары