Дзяўчына перабрала наркотыкаў і заснула ў ванне, затапіўшы суседзяў. І гэта быў толькі пачатак праблем
Маладая жанчына ў Мінску, ужыўшы наркотыкі, пайшла прыняць ванну і там страціла прытомнасць. Калі вада затапіла суседзяў, да яе прыйшлі, і ў працэсе высветлілася, што фігурантка не толькі ўжывала, але і распаўсюджвала псіхатропныя рэчывы, піша агенцтва «Мінск-Навіны».
Увечары 12 лютага жыхары кватэры дома на вул. Кірылы Тураўскага заўважылі, што сцены і столь у ванным пакоі і калідоры намоклі — затапілі суседзі зверху. Паколькі спробы дастукацца да гаспадароў не мелі поспехаў, выклікалі ратавальнікаў.
Супрацоўнікі МНС знайшлі ў ванным пакоі непрытомную маладую жанчыну, якую да такога стану прывяла вострая наркатычная інтаксікацыя. Следча-аператыўная група зрабіла агляд асабістых рэчаў пацярпелай, а яе заплечнік і мабільны тэлефон канфіскавала для захавання маёмасці.
Праз тыдзень пасля выпіскі з бальніцы жанчына прыйшла ў міліцыю па свае рэчы і каб даць тлумачэнні адносна таго, што адбылося. Факт ужывання наркотыкаў яна не адмаўляла. Але ў яе тэлефоне знайшлі незвычайную перапіску, з якой вынікае, што яна не толькі сама ўжывала наркотыкі, але і распаўсюджвала іх.
У выніку высветлілася, што дзяўчына ўладкавалася ў інтэрнэт-краму па продажы наркотыкаў на пасаду «мінёра», яе дзеянні курыраваў аператар наркашопа. У той дзень, атрымаўшы заданне, яна павінна была забраць «скарб», але перад гэтым ужыла альфа-PVP і заснула ў ваннай з уключанай вадой.
Пасля атрымання каардынатаў размяшчэння тайніка міліцыянеры адправіліся ў лясны масіў паблізу Копішча пад Мінскам, дзе выявілі і канфіскавалі скрутак з псіхатропным рэчывам.
Цяпер Мінскім раённым аддзелам Следчага камітэта ў дачыненні да 33-гадовай фігуранткі ўзбуджаная крымінальная справа па ч. 3 арт. 328 КК («незаконныя з мэтай збыту выраб, перапрацоўка, набыццё, захоўванне, перавозка або перасылка альбо незаконны збыт наркатычных сродкаў, псіхатропных рэчываў альбо іх прэкурсараў або аналагаў у буйным памеры»).
Цяпер чытаюць
Былы міністр культуры Руслан Чарнецкі знайшоў сабе падпрацоўку9
Каментары
пасля гэтага міліцыянтаў ніхто не бачыў?