У інтэрнаце па вуліцы Акадэміка Красіна, 49 у Мінску адбылося ўзгаранне. На месцы здарэння працавалі ратавальнікі.
Паводле інфармацыі МНС, пасля прыбыцця ратавальнікаў да месца выкліку назіраўся дым з акна на чацвёртым паверсе.
«У жылым пакоі адбывалася адкрытае гарэнне маёмасці, а з суседняга з падпаленым пакоя жанчына прасіла пра дапамогу», — расказалі ў ведамстве.
«Работнікі МНС праніклі ў небяспечную зону і пры дапамозе маскі для выратавання вывелі жанчыну 1984 г. н. на свежае паветра. Яе перадалі брыгадзе хуткай медыцынскай дапамогі для агляду. Пасля высветлілася, што яна не пацярпела», — адзначылі ў МНС.
У выніку здарэння згарэла маёмасць у двух жылых пакоях, кухні і калідоры на агульнай плошчы 30 кв. м. Дзякуючы спрацоўванню сістэмы апавяшчэння аб пажары да прыбыцця падраздзяленняў МНС з палаючага пад'езда 25 чалавек самастойна эвакуяваліся. Яшчэ 45 чалавек эвакуяваліся з суседніх пад'ездаў.
Прычыны і абставіны здарэння высвятляюцца.
Цяпер чытаюць
Мінск, Варшава, Вільня — параўноўваем, дзе прасцей купіць кватэру чалавеку з сярэдняй зарплатай1
Каментары