Напад Расіі на краіну НАТА магчымы праз пяць-восем гадоў — Мінабароны Нямеччыны
«Мы чуем пагрозы з Крамля амаль кожны дзень — апошнім часам зноў у адрас нашых сяброў у краінах Балтыі. Таму мы павінны ўлічваць, што Уладзімір Пуцін можа аднойчы нават напасці на адну з краін НАТА», — заявіў міністр абароны Нямеччыны Барыс Пісторыус у інтэрв'ю газеце Tagesspiegel.
«Нашы эксперты мяркуюць, што гэта было б магчыма ў часавым прамежку ад пяці да васьмі гадоў», — сказаў ён, адзначыўшы, што не лічыць напад імаверным цяпер.
Міністр заклікаў прыняць меры засцярогі загадзя, у прыватнасці ўзмацніўшы абаронную прамысловасць. Акрамя таго, ён ужо вылучаў ідэю аб увядзенні абавязковай вайсковай службы, адпаведную прапанову ён чакае ад свайго міністэрства да красавіка. Міністр заявіў, што гатовы адкрыць доступ ва ўзброеныя сілы для салдат без нямецкага пашпарта.
«Мы не будзем першымі ўзброенымі сіламі ў Еўропе, якія зробяць гэта», — сказаў Пісторыус. У краіне ёсць людзі, якія ў другім ці трэцім пакаленні жывуць у Нямеччыне, але пакуль не маюць нямецкага грамадзянства, зазначыў ён.
«Мы павінны хутка ўмацаваць наш абаронны патэнцыял у святле вастрыні пагрозы», — сказаў Пісторыус.
У канцы снежня Bild спрагназавала, што напад Расіі на краіны НАТА можа адбыцца ўжо наступнай зімой.
Цяпер чытаюць
Ціханоўская — Трампу: Лукашэнку трэба пакараць, а не заахвочваць19
Каментары