«Другога такога проста не вытрымаю». Няўдалыя першыя спатканні вачыма хлопцаў
Беларускія мужчыны даказалі, што жыццё можа быць не горшым за сюжэт камедыйнага сіткома — асабліва калі справа тычыцца першых спатканняў. Пераказваем гісторыі хлопцаў пра рамантычныя сустрэчы, якія пайшлі не па плане.
«Ты такі скнара»
Антон: «Запрасіў калегу на спатканне. Сустрэліся ў кафэ: размаўлялі, абмяркоўвалі боса і планы на водпуск. Усё было добра. Калі прынеслі рахунак, я пацягнуўся за кашальком, але яна прапанавала сама за сябе заплаціць. Вядома, пярэчыць я не стаў — падумаў, што яна феміністка і гэтым магу закрануць яе пачуцці. Разлічыліся. Як сышоў афіцыянт, яна выпаліла, што не думала, што я такі скнара. Сказала, што я не мужык, таму што не настойваў на поўнай аплаце. Перавёў ёй грошы на картку і на гэтым паставіў кропку».
«Слала паведамленні кожныя 30 секунд»
Сяргей: «Пазнаёміліся з дзяўчынай у Tinder, пару дзён перапісваліся, а потым вырашылі сустрэцца ў рэстаране. Спатканне ішло выдатна: яна шмат жартавала, расказвала гісторыі з жыцця. Зрэшты, часам праскоквалі дзіўныя «званочкі»: дзяўчына была крыху нервовай, часта перабівала, задавала няёмкія пытанні афіцыянтам, аднак гэта я спісаў на хваляванне. У канцы вечара я падвёз яе да хаты, мы міла развіталіся і вырашылі сустрэцца яшчэ раз.
Самае цікавае пачалося на наступны дзень. Яна слала паведамленні кожныя 30 секунд: пыталася, як маюся, чым я займаюся, скідала мемы і карцінкі. Я быў на працы і не мог так часта адказваць. У нейкі момант яна напісала: «Усё з табой зразумела. Сказаў бы адразу, што не хочаш са мной размаўляць», – і кінула ў блок. Шчыра кажучы, у гэты момант я адчуў палёгку».
«Шукала партнёра для сэксу ўтраіх»
Павел: «На першым спатканні сказала, што замужам і прыйшла таму, што ёй спадабаліся мае фота. Аказалася, яна шукала партнёра для сэксу ўтраіх і, акрамя выгляду і майго стану здароўя, ёй нічога не цікава. Падзякаваў, што яна адразу расказала пра свае планы — на гэтым і разышліся».
«Моўчкі пайшоў»
Ігар: «У «рэкамендаваных» інстаграма наткнуўся на акаўнт прыгожай брунеткі. Пачалі размаўляць у дырэкце. Праз пару дзён яна даслала паведамленне, маўляў, «сяджу ў бары, калі не заняты, прыязджай да мяне». Прыехаў. Бачу, мая паненка ўжо падпіўшы. Сказала, што святкуе пятніцу, замовіла шмат усяго, а кашалек пакінула дома і ёй патрэбен хтосьці, хто закрые рахунак. Я моўчкі пайшоў».
«Другога такога спаткання проста не вытрымаю»
Стас: «Гулялі па парку, расказвалі адно аднаму пра свае захапленні. Калі размова зайшла пра любімыя фільмы, дзяўчына назвала той, пра які я нават не чуў. Да канца вечара яна расказвала пра сюжэт і ўнёсак гэтай карціны ў сусветную культуру. Мае спробы мякка перавесці тэму ігнараваліся.
Шчыра кажучы, лекцыя была сумнай. Паразважаўшы, я вырашыў, што другога такога спаткання проста не вытрымаю».
«Як жа я здзівіўся…»
Арцём: «Справа была позняй восенню. Я ўсё прадумаў: сустрэў яе з працы, павёў вячэраць. Потым мы прагуляліся, а калі змерзлі, пайшлі піць глінтвейн. Мне здавалася, што ў нас здарыўся канэкт і мы сустрэнемся яшчэ раз.
Як жа я здзівіўся, калі падчас развітання яна падбадзёрвальна паляпала мяне па плячы і сказала: «Мусіць, мужчыны — гэта не маё». На наступны дзень я запісаўся да псіхолага».
А якія найгоршыя спатканні былі ў вас?
Каментары