Да Пуціна не паехалі дзве траціны афрыканскіх лідараў, Крэмль вінаваціць Амерыку
27 ліпеня ў Санкт-Пецярбургу ладзіцца маштабны форум Расія — Афрыка, які расійскае кіраўніцтва мела намер выкарыстаць для дэманстрацыі шырокай падтрымкі дзеянняў Расіі па-за межамі заходняга свету. Але з 54 краін Афрыкі толькі 17 адправілі на саміт дэлегацыі з удзелам кіраўнікоў дзяржаў, яшчэ 10 прысылаюць прэм'ер-міністраў, піша The Moscow Times.
Невялікая колькасць кіраўнікоў дзяржаў на форуме Расія — Афрыка стала вынікам «нахабнага ўмяшання» ЗША, Францыі і іншых дзяржаў, заявіў у сераду прэс-сакратар Пуціна Дзмітрый Пяскоў.
«Праз іх дыппрадстаўніцтвы былі спробы аказаць ціск на кіраўніцтва гэтых краін дзеля таго, каб перашкодзіць іх удзелу ў форуме», — расказаў Пяскоў на брыфінгу.
Па словах Пяскова, умяшанне Захаду — «абсалютна абуральны» факт, які, зрэшты, «ніякім чынам не перашкодзіць правядзенню саміту».
Лідараў афрыканскіх краін на сёлетнім форуме ўдвая менш, чым на аналагічным форуме 2019 года, дзе на найвышэйшым узроўні былі прадстаўлены 45 афрыканскіх краін. Пры гэтым пяць дзяржаў адмовіліся ад удзелу ў саміце цалкам, а палова дэлегавала на яго чыноўнікаў другога рангу: з 17-ці краін прыехалі віцэ-прэм'еры і міністры, а яшчэ з пяці — проста паслы.
У такой сітуацыі Пуцін плануе асабіста сустрэцца з кожным лідарам афрыканскіх дзяржаў, якія рызыкнулі да яго даехаць. У яго запланаваны перамовы з прэзідэнтамі Егіпта, Мазамбіка, Бурундзі, Зімбабвэ, Уганды, Эрытрэі, Цэнтральна-Афрыканскай Рэспублікі, Лівіі, Камеруна, Сенегала, Паўднёва-Афрыканскай Рэспублікі, Буркіна-Фасо, Гвінеі-Бісау, Малі і Конга.
28 ліпеня Пуцін збіраецца выступіць перад афрыканцамі з вялікай прамовай, у якой раскажа пра фармаванне «новага светапарадку» на аснове «шматпалярнасці і роўнасці» ўсіх дзяржаў.
Цяпер чытаюць
Начальнік крымінальнага вышуку МУС бачыў прагулачны дворык СІЗА КДБ з акна свайго кабінета, а потым сам стаў вязнем3
Каментары