Кожны год санэпідслужбы праводзяць кантроль паркаў і пляжаў і складаюць анлайн-карту самых «клешчавых» месцаў, дзе людзям варта быць асабліва ўважлівымі і выконваць неабходныя захады засцярогі.
У Мінску выявілі 16 тэрыторый, дзе колькасць кляшчоў перавышае дапушчальныя нормы. Падрабязнасці прыводзіць Tochka.by са спасылкай на Мінскі гарадскі цэнтр гігіены і эпідэміялогіі.
Больш за ўсё кляшчоў спецыялісты выявілі ў гэтых месцах:
- лес на Цнянскім вадасховішчы,
- Парк камянёў,
- Парк Цівалі,
- Антонаўскі парк
- парк імя Грэкавай,
- экасцежка Мядзвежына,
- экасцежка «Горад птушак»,
- Яблыневы сад і прылеглыя да яго тэрыторыі па вул. маршала Лосіка — вул. Ю. Семянякі і іншыя месцы,
- на 6 пляжах Мінска.
У Мінскім гарадскім цэнтры гігіены і эпідэміялогіі нагадалі, што кіраўнікі суб'ектаў гаспадарання абавязаныя на сваіх тэрыторыях правесці ўборку, добраўпарадкаваць зоны адпачынку, а таксама выкарыстоўваць дадатковы метад барацьбы з кляшчамі — хімічную апрацоўку.
Кляшчы сталі небяспечнейшымі
Самым распаўсюджаным наступствам укусу можа стаць заражэнне клешчавым энцэфалітам і барэліёзам (яго яшчэ называюць хваробай Лайма). У Беларусі фіксуецца рост клешчавых інфекцый: у 2,1 і ў 2,4 разу па энцэфаліце і Лайм-барэліёзе адпаведна, сведчыць статыстыка за мінулы год.
Больш за ўсё выпадкаў клешчавога энцэфаліту рэгіструецца ў Гродзенскай і Брэсцкай абласцях — да 70% ад агульнай колькасці па краіне. Акрамя таго, былі выпадкі заражэння не толькі праз укус кляшча, але і пры ўжыванні сырога казінага малака: 19 такіх пацыентаў за мінулы год.
Сімптомы клешчавога энцэфаліту — моцны галаўны боль, дрыжыкі, млоснасць і ваніты, ныючыя болі ў руках і нагах. Ліхаманка можа доўжыцца 4-5 дзён, потым стан паляпшаецца, але за гэты час, на працягу некалькіх тыдняў, пашкоджваюцца мазгавыя абалонкі.
Захворванне можа прывесці да інваліднасці: паколькі пашкоджаная нервовая сістэма, гэта пагражае эпілепсіяй, парушэннем кровазвароту, памяці, мыслення, успрымання. З-за пашкоджання мозгу цярпіць і дыхальная сістэма, што можа прывесці да смяротнага зыходу.
Хвароба Лайма выяўляецца сыпам на скуры, галаўным болем, высокай тэмпературай, ванітамі, а таксама паражэннем нервовай і сардэчна-сасудзістай сістэм, апорна-рухальнага апарата.
Калі лячэнне будзе пачатае своечасова, то наступстваў перанесенай інфекцыі можа практычна не назірацца. Але нярэдка пры сур'ёзных неўралагічных і сустаўных паражэннях поўнага выздараўлення можа і не здарыцца, магчымая інваліднасць.
На нарадзе ў Лукашэнкі публічна пасварыліся чыноўнікі. Ён не ведаў, каго падтрымаць15
Каментары