У Прыкарпацці размножыліся зялёныя папугаі. Здаецца, хутка яны расселяцца і на поўдні Беларусі
Экзатычная птушка за паўтара года настолькі распаўсюдзілася ў Чарнаўцах ва Украіне, што пачынае станавіцца праблемай для мясцовай фаўны.
Як паведамляюць сацыяльныя сеткі, папугаі добра сябе адчувалі гэтай зімой у Чарнаўцах і суседніх вёсках. А яшчэ ў 2022 годзе мэр горада выклаў фота папугаяў на гарадскіх дрэвах. Цяпер яны сталі звычайнай гарадской птушкай.
Гэта інвазіўны від папугаяў — папугай Крамера, ці індыйскі кольчаты папугай. Гэтая птушка вытрымлівае холад да мінус 20 градусаў марозу і ўсёедная. Яна можа харчавацца адкідамі са сметніцы. Гэта адзіны папугай, які жыве адразу ў дзвюх частках свету. Звычайным арэалам рассялення гэтага віду папугаяў з'яўляецца Паўднёвая Азія і шэраг раёнаў Афрыкі.
Аднак не трэба спяшацца радавацца. Яны ўяўляюць таксама небяспеку для мясцовых экасістэм, парушаючы існуючы міжвідавы баланс і аказваючы сур'ёзны ціск на некаторыя мясцовыя віды птушак. Папугаі займаюць дуплы, дзе прывыклі гнездавацца іншыя птушкі-старажылы, асабліва дзятлы. Нават папуляцыі кажаноў ад іх вельмі пакутуюць, бо гэтыя папугаі таксама іх «высяляюць» з дамоў.
Трэба адзначыць, што папугаі Крамера жывуць калоніямі ці вялікімі групамі. Арнітолагі параўноўваюць гэтую птушку з каларадскім жуком, які таксама спачатку быў экзотыкай, а пазней стаў асноўным ворагам палеткаў бульбы і іншых паслёнавых раслін.
Спецыялісты адзначаюць, што гэтых птушак усё часцей можна ўбачыць у розных месцах Еўропы, дзе іх раней не было.
У Лондане папугаі апошнія гады пачалі ўяўляць сур'ёзную праблему для горада, наносячы шкоду пасадкам культурных пладовых дрэў. Больш за тое, папугаі Крамера пачалі хутка выцясняць спрадвечныя брытанскія віды птушак з іх экалагічных нішаў. Небяспеку ўяўляе таксама і тое, што папугаі могуць разносіць захворванні птушак.
Як расказалі нядаўна «Нашай Ніве» мясцовыя жыхары, папугаяў ужо заўважылі і ў адным з раёнаў Берасцейшчыны.
Чытайце яшчэ:
На Палессі пабачылі першых буслоў, што прыляцелі з выраю. Сёлета яны вярнуліся раней, чым звычайна
Як адпудзіць куніцу — гэты звярок мілы, але ад яго бывае столькі праблем
Цяпер чытаюць
У Тайландзе знікла анліфаншчыца з Пінска. Яе маглі прадаць у М'янму3
Каментары