Кіраўнік Bellingcat Хрыста Грозеў праз пагрозу жыццю быў вымушаны пакінуць Вену, дзе жыў
Балгарскі журналіст, адзін з самых вядомых у свеце расследавальнікаў, дырэктар групы Bellingcat Хрыста Грозеў вымушаны пераехаць з Аўстрыі, дзе ён пражыў амаль 20 гадоў, з-за меркаванай пагрозы з боку расійскіх спецслужбаў. Пра гэта піша Moscow Times са спасылкай на аўстрыйскую газету Falter.
«Я падазраю, што расійскіх агентаў, інфарматараў і падручных у горадзе больш, чым паліцэйскіх», — сказаў Грозеў Falter.
Паведамляецца, што журналіст быў вымушаны адмяніць запланаванае вяртанне ў Вену з паездкі ў Злучаныя Штаты пасля таго, як кантакты з выведкі папярэдзілі яго, што ён можа апынуцца ў небяспецы, калі вернецца.
53-гадовы Грозеў адыграў вядучую ролю ў шэрагу найбольш гучных расследаванняў Bellingcat, у тым ліку ў справе атручэння ў 2018 годзе расійскага падвойнага агента Сяргея Скрыпаля і яго дачкі ў брытанскім горадзе Солсберы, атручэння ў 2020 годзе крытыка Крамля Аляксея Навальнага ў Сібіры.
Расія абʼявіла Грозева ў вышук у снежні.
У ліпені Федэральная служба бяспекі Расіі заявіла, што Грозеў удзельнічаў у «сарванай змове» з мэтай захопу расійскіх знішчальнікаў, але не паведаміла, ці была распачатая крымінальная справа супраць журналіста.
Грозеў адхіліў абвінавачванні і абвінаваціў расійскую ўнутраную разведку ў падробцы доказаў.
Цяпер чытаюць
Позна ўвечары Лукашэнка паразмаўляў яшчэ і з Джонам Коўлам. Імаверна, гаворка ішла пра ўмовы і тэрміны вызвалення палітвязняў2
Каментары