У Магілёве развесілі на вуліцы прапагандысцкія плакаты — да раніцы ад іх застаўся толькі скотч
Лукашысты развесілі ў цэнтры Магілёва палітычныя шаржы ў духу сталінізму. Але з надыходам цемры плакаты пазрывалі.
У Магілёве шукаюць новыя спосабы данясення да насельніцтва дзяржаўнага светапогляду.
12 студзеня падкантрольныя ідэолагам СМІ паведамілі пра «імправізаваную карцінную галерэю», якую нібыта разгарнуў па сваёй ініцыятыве «неабыякавы мастак» у цэнтры горада. Як сцвярджалася, ён паказаў у сваіх творах «уласнае стаўленне да геапалітычнай сітуацыі ў свеце і наглядна прадэманстраваў палітычную абстаноўку ў нашых суседзяў».
Працы «мастака» выглядалі скапіяванымі з палітычных шаржаў часоў сталінізму і гумарыстычнага часопіса «Вожык».
За савецкім часам ідэолагі такімі карцінкамі высмейвалі парадкі ў краінах Захаду, а тым часам савецкія людзі з ахвотай спажывалі іх прадукцыю і зайздросцілі дастатку жыхароў. Што высмейваюць імі лукашысты незразумела, бо ў суседняй краіне вайна і ў ёй гінуць людзі.
Галерэя «неабыякавага мастака» правісела на агароджы стадыёна «Спартак» да цемнаты. Увечары магілёўцы «творы» пазрывалі.
«Наша Нiва» — бастыён беларушчыны
ПАДТРЫМАЦЬ
Каментары