Зорны асілак з Чэрыкава расказаў, чаму змяніў Маскву на малую радзіму
35‑гадовы трэнер Максім Дончанка вядзе папулярны блог у інстаграме — на сёння ён мае ажно 840 тысяч падпісчыкаў. Днямі завірусіўся яго ролік, дзе Максім патлумачыў, чаму вырашыў перабрацца з Масквы назад у родны Чэрыкаў.
Некалі ў родным Чэрыкаве малы Максім распачынаў хадзіць у мацоўню, потым папрацаваў танцорам і стрыптызёрам у Кітаі і Маскве. Там жа, у Расіі, мужчына распачаў кар’еру ў фітнэсе і трэнерстве, завёў папулярныя блогі ў сацсетках.
Але ж з нядаўняга часу Дончанка зноў жыве ў родным горадзе і, выглядае, назад у Маскву не спяшаецца. Ролік пра тое, чым Максіма так вабіць малая радзіма, за тыдзень набраў больш за 45 тысяч лайкаў і амаль тысячу каментароў.
«Бадзяючыся па свеце, у свае 35 годзікаў я зразумеў адну рэч. Я сам беларус і жыў доўгі час у Маскве, і калі пераехаў да сябе на малую радзіму, у Чэрыкаў, для сябе адкрыў невідавочныя плюсы маленькага горада, хаця да гэтага ў жыцці не думаў, што буду хацець тут жыць», — дзеліцца Максім.
Плюс нумар адзін, на яго думку — гэта цішыня:
«Тут няма машын, якія ездзяць, б**дзь, 24 на 7. Я забыўся, як гучыць цішыня. Прыкінь, ты прыходзіш і настолькі ціха, што ажно звініць у вушах».
Далей Максім адзначае, што і паветра ў Чэрыкаве зусім не тое, як у Маскве — маўляў, і аднаўляцца падчас трэніровак, і дыхаць атрымлівае лепш.
Яшчэ адзін плюс — час:
«У вялікім горадзе, каб даехаць з пункта А ў пункт Б, можа спатрэбіцца ад паўгадзіны да дзвюх гадзін, а то і да трох, калі заторы. А тут, каб перасунуцца па горадзе, заехаць у краму, заехаць у мацоўню і яшчэ некуды, я выдаткоўваю хвілін 15 і нечакана для сябе эканомлю 2‑3 гадзіны на дзень».
Максім усё ж не ідэалізуе жыццё ў глыбінцы і кажа, што паўсюль ёсць свае плюсы і мінусы. Ёсць рэчы, якіх у Чэрыкаве проста няма:
«Зразумела, што тут няма працы. Зразумела, што тут няма дастаўкі і клубаў, куды можна пайсці патусіць, або п***атых кавярняў. Але да 35 гадоў я зразумеў, што я хачу высыпацца, менш стрэсаваць і менш выдаткоўваць час на ўсякую х**ню. І на гэты момант я задаволены, што я жыву ў вёсцы!»
Максіму ўказалі ў каментарах, што Чэрыкаў — гэта яшчэ не вёска і бываюць больш глухія беларускія мястэчкі, напрыклад, Хоцімск. А вось праз Чэрыкаў праходзіць траса з Магілёва ў бок Расіі, недалёка ад Чэрыкава ёсць чыгунка.
І ўсё ж каларытны мацак знайшоў у сваіх падпісчыкаў поўнае разуменне:
«Мне 35, і я сяджу ківаю на кожнае слова».
«Прыгажун ва ўсіх сэнсах».
«Вось што такое сталенне».
«Наша Нiва» — бастыён беларушчыны
ПАДТРЫМАЦЬ
Каментары