Ва Украіне ваююць «вагнераўцы», якіх затрымлівалі ў 2020 годзе ў Беларусі
«Украінская праўда» ідэнтыфікавала членаў ПВК «Вагнер», якія цяпер ваююць супраць Украіны і якіх затрымоўвалі ў 2020 годзе ў Мінску. Украінскія спецслужбы зладзілі тады спецаперацыю, каб выманіць іх ва Украіну.
Адным з баевікоў аказаўся 41-гадовы Максім Кошман па мянушцы «Коршун». З 2014-га ён пазаштатны баец ПВК «Вагнер» і адзін з 33 наймітаў, якіх у 2020 годзе затрымалі ў Беларусі і аддалі Расіі.
Ва Украіне супраць Кошмана заведзеная крымінальная справа па факце ўдзелу ў незаконным узброеным фармаванні падчас псеўдарэферэндуму ў Славянску ў 2014 годзе.
Пасля ўсталявання кантролю над горадам украінскімі вайскоўцамі, Кошман збег у акупаваную Горлаўку і працягнуў удзел у вайне супраць Украіны. Пасля атрымаў пашпарт Расіі.
Аналіз яго сацсетак сведчыць, што ён да гэтага часу пражывае ў так званай «ДНР», атрымліваў узнагароды ад акупацыйных уладаў.
Сярод тых, каго затрымлівалі ў Беларусі ў 2020 годзе быў таксама Генадзь Фяцісаў. Раней ён служыў у падраздзяленні «Беркут» украінскай міліцыі. Цяпер жыве ў «ДНР» і ваюе супраць Украіны.
Ён актыўна падтрымліваў у сацсетках пачатак «спецаперацыі» і псеўдарэферэндум.
Яшчэ адзін з былых затрыманых у Мінску наймітаў «Вагнера» Уладзімір Селіхаў таксама падтрымлівае вайну Расіі супраць Украіны.
Ён амаль не публікуе фота з вайны. Ёсць толькі некалькі ў форме і з расійскім сцягам. Іншыя — у цывільным, але ў каментарах ён тлумачыць, што фота старыя.
«Вагнеравец» Андрэй Чарнышоў удзельнічаў у захопе Луганскага аэрапорта летам 2014-га. Праз чатыры гады трапіў у спіс СБУ як найміт, які быў дастаўлены ў Сірыю на ракетным крэйсеры «Вараг» і ваяваў у гэтай краіне. У 2022-м вярнуўся ваяваць супраць Украіны і ўлетку загінуў.
Ураджэнец Комі Антон Вахтураў таксама загінуў на вайне супраць Украіны. Пра гэта сведчыць запіс у сацсетках і ў мясцовых навінах.
Па даных былых супрацоўнікаў украінскіх спецслужбаў, менавіта Антон Вахтураў быў адным з удзельнікаў пакарання грамадзянскага чалавека ў Сірыі.
Тады «вагнераўцы» замучылі бяззбройнага мужчыну, адрэзалі яму галаву, разбілі яе кувалдай і спалілі цела. Усё гэта баевікі здымалі на відэа.
У жніўні 2020 года УП распавядала, што ўкраінскія спецслужбы рыхтавалі маштабную аперацыю па затрыманні групы баевікоў ПВК «Вагнер», для чаго выманілі іх у Беларусь. Аднак пасля таго, як сілавікі далажылі аб гэтых планах Офісу прэзідэнта Украіны, спецаперацыя правалілася.
Лукашэнка ж некаторы час меркаваў, што гэта аперацыя Расіі супраць яго рэжыму. Вагнераўцаў затрымалі беларускія сілавікі. Пасля іх перадалі Расіі.
Чытайце таксама:
Год таму затрымалі вагнераўцаў. Згадваем, як іх звязвалі з Ціханоўскім і як перад імі выбачаўся Віктар Лукашэнка
Зяленскі: Лукашэнка гаварыў мне пра вагнераўцаў: «Я не падвяду, усё будзе нармальна, я разбяруся»
Хто яны — 33 затрыманыя баевікі? Снайперы, разведчыкі, беркутаўцы з «ДНР» ФОТЫ
Цяпер чытаюць
Спявачку Мэрыем Герасіменка на працягу двух гадоў збіваў муж26
Каментары