Што трэба рабіць, каб не заразіцца грыпам у перыяд уздыму захворвання на ВРІ
Уздым захворвання на вострыя рэспіраторныя інфекцыі (ВРІ), як правіла, прыпадае на восень і зіму. Што трэба рабіць, каб не заразіцца грыпам у гэты перыяд, пішуць «Мінск-Навіны».
Інтэнсіўнасць, частата і дамінаванне пэўных вірусных інфекцый залежаць ад пары года і асаблівасцяў клімату. Найбольш распаўсюджаныя — вірусы грыпу, парагрыпу, адэнавірусы, каранавірусы, метапнеўмавірус чалавека, рэспіраторна-сінцытыяльны вірус, рынавірусы чалавека, бакавірусы.
— Вірусы грыпу ўнікальныя, паколькі яны выклікаюць штогадовыя эпідэмічныя ўздымы захворвання, а таксама прымаюць форму пандэмічнага распаўсюджвання з уцягваннем у эпідэмічны працэс насельніцтва ўсіх узростаў, — падкрэсліла Марыя Навышная, доктар-эпідэміёлаг супрацьэпідэміялагічнага аддзялення Мінскага гарадскога цэнтра гігіены і эпідэміялогіі.
Характэрнымі сімптомамі ВРІ з’яўляюцца: рэзкае павышэнне тэмпературы да 39-40 °C, сухі кашаль, закладзены нос, галаўны боль, ламата ў целе.
Крыніца інфекцыі — чалавек, які хварэе. Яна перадаецца паветрана-кропельным шляхам (падчас чхання, кашлю) і кантактным (напрыклад, агульныя прадметы гігіены, сталовыя прыборы без апрацоўкі).
— Небяспека захворвання на грып — ва ўскладненнях і неспрыяльных выніках, якія развіваюцца пасля перанесенай хваробы. Вірус грыпу прыгнятае і аслабляе імунную сістэму, тым самым дае магчымасці для далучэння іншых інфекцыйных узбуджальнікаў, развіцця такіх станаў, як інсульт, інфаркт і г. д., — распавяла доктар-эпідэміёлаг.
Прафілактыка складаецца ў агульным аздараўленні. Трэба ўмацоўваць арганізм і стымуляваць імунітэт загартоўваннем, заняткамі фізкультурай, ужываннем паўнавартаснай ежы. Трэба часцей гуляць на свежым паветры, асабліва дзецям і людзям сталага ўзросту (хада з правільнай рэгуляцыяй дыхання ўзмацняе лёгачную вентыляцыю, паляпшае сістэму кровазвароту, гартуе арганізм).
У перыяд ўздыму захворвання на ВРІ і грыпу трэба выконваць шэраг простых правілаў: памятаць аб сацыяльнай дыстанцыі (адлегласць паміж людзьмі павінна быць 1-1,5 м), выкарыстоўваць сродкі індывідуальнай абароны органаў дыхання ў месцах збору людзей (асабліва калі немагчыма выконваць дыстанцыю), часцей мыць рукі з мылам, выкарыстоўваць сродкі-дэзінфектары на спіртавой аснове, па магчымасці не наведваць масавыя мерапрыемствы, асабліва ў закрытых памяшканнях, імкнуцца не кантактаваць з людзьмі, у якіх ёсць сімптомы ВРІ, часта праветрываць памяшканні, не забываць пра вільготную ўборку.
Таксама М. Навышная распавяла, што трэба выконваць «рэспіраторны этыкет» у грамадскіх месцах, — гэта можа абмежаваць распаўсюд рэспіраторных захворванняў.
Так, пры кашлі і чханні трэба выкарыстоўваць насоўку, хоць лепш — аднаразовыя папяровыя хусткі. Калі няма насоўкі, варта чхаць і кашляць не ў далоні, а ў выгін локця, не дакранацца да твару нямытымі рукамі.
Каментары