Пераможца нацыянальнага фіналу дзіцячага конкурсу песні «Еўрабачанне-2009» выканае песню «Санта Лючыя».
Пераможца нацыянальнага фіналу дзіцячага конкурсу песні «Еўрабачанне-2009» выканае песню «Санта Лючыя».
25 верасня пераможца нацыянальнага фіналу дзіцячага конкурсу песні «Еўрабачанне-2009» Юрый Дземідовіч выступіць на мерапрыемстве ў межах візіту ў Беларусь патрыярха Маскоўскага і ўсяе Русі Кірыла. Пра гэта паведаміў настаўнік выканаўцы, мастацкі кіраўнік капэлы хлопчыкаў гімназіі-каледжа пры Беларускай акадэміі музыкі Уладзімір Глушакоў 11 верасня на прэс-канферэнцыі ў Мінску.
Паводле яго слоў, Юру Дземідовіча запрасілі сольна выступіць у Палацы Рэспублікі. Ён выканае песню «Санта Лючыя».
Як паведаміў Глушакоў, у яго выхаванца багаты вопыт выступленняў. Ён спяваў як у складзе капэлы хлопчыкаў, гэтак і сольна. Так, Дземідовіч саліраваў у музычным нумары на выступленні падчас прыезду ў Мінск патрыярха Маскоўскага і ўсяе Русі Аляксія II.
У складзе капэлы хлопчыкаў Юрый неаднаразова выступаў у Германіі, Францыі і іншых краінах. Адно з найбольш запамінальных выступленняў — на канцэрце ў гонар гадавіны адкрыцця помніка славутаму віяланчэлісту Мсціславу Растраповічу ў акадэміі яго імя ў Франкфурце (Германія). Капэла хлопчыкаў выступала са знакамітым віяланчэлістам Міхаілам Майскім, адным з вучняў Растраповіча.
«У мяне пытаюцца, колькі вы рыхтаваліся да «Еўрабачання». Мы рыхтаваліся да гэтага ўсё жыццё», — зазначыў Глушакоў.
Рабочы візіт у Беларусь патрыярха Маскоўскага і ўсяе Русі Кірыла запланаваны на 25—28 верасня.
Цяпер чытаюць
Былога супрацоўніка контрразведкі КДБ арыштавалі за здраду дзяржаве9
Каментары