І што трэба зрабіць у першыя гадзіны.
Доктар-інфекцыяніст прыёмнага аддзялення Гарадской клінічнай інфекцыйнай бальніцы Мінска Мікіта Салавей нагадаў у фэйсбуку пра галоўныя правілы пры ўкусе кляшча.
Калі вас укусіў клешч, то пасля яго выдалення трэба аднакратна прыняць даксіцыкліну (200 мг дарослым, 4,4 мг/кг, але не больш за 200 мг дзецям).
«Нават дзецям і цяжарным аднакратна доксіцыклін можна! Піць яго даўжэй за 1 дзень для прафілактыкі бессэнсоўна — гэта не абароніць вас мацней, але ўдарыць па мікрабіёце», — звяртае ўвагу спецыяліст.
Здаваць кляшча ў лабараторыю бескарысна.
«Мы лечым людзей, а не кляшчоў! Нават калі прыйдзе «дрэнны» вынік, ваша тактыка не мяняецца: аднакратна доксіцыклін у першыя 72 гадзіны + назіранне за самаадчуваннем і месцам укусу роўна месяц».
Не трэба адразу бегчы здаваць аналізы крыві, бо «чароўных» тэстаў няма.
«Раннія аналізы не пакажуць інфекцыю. Антыцелы пры клешчавым энцэфаліце з’яўляюцца не раней за 2 тыдні ад першых сімптомаў, а пры хваробе Лайма — толькі праз 4—6 тыдняў пасля з’яўлення на скуры мігрыруючай эрытэмы (плямы)», — тлумачыць медык.
Сімптомы ў першыя дні — гэта не інфекцыя, кажа Салавей.
«Чырвоная пляма ў першыя гадзіны або лёгкае недамаганне — гэта проста алергія на сліну кляшча. У любой інфекцыі ёсць інкубацыйны перыяд — ён не бывае меншым за 3 дні».
Імунаглабулін не працуе.
«Згодна з пратаколамі ў Беларусі, супрацьклешчавы імунаглабулін не выкарыстоўваецца для прафілактыкі клешчавога энцэфаліту — ён неэфектыўны. Адзіная рэальная абарона — гэта вакцынацыя», — папярэджвае доктар.
Цяпер чытаюць
Рэдкі выпадак: памілаваны беларускі палітвязень пайшоў на вайну супраць Украіны19
Рэдкі выпадак: памілаваны беларускі палітвязень пайшоў на вайну супраць Украіны
«Стрэльба калі і стрэліць, то наўрад ці кулямётнай чаргой». Максім Знак ацаніў рэальнасць пагроз беларускай прапаганды пазбавіць грамадзянства палітэмігрантаў1212
Каментары