За заклікі да санкцый будуць караць больш жорстка. Дэпутаты прынялі ў першым чытанні законапраект
Дэпутаты Палаты прадстаўнікоў прынялі ў першым чытанні законапраект «Аб змене Крымінальнага кодэкса Рэспублікі Беларусь». Праект закона быў унесены ў Палату па даручэнні Лукашэнкі дэпутатам Алегам Белаконевым, паведамляе БелТА.
Згодна з праектам, «у сувязі з распаўсюджваннем новых спецыфічных відаў супрацьпраўнага паводзінаў і з мэтай узмацнення прэвентыўнага патэнцыялу» артыкул 361 Крымінальнага кодэкса выкладаецца ў новай рэдакцыі.
Становіцца больш жорсткай крымінальная адказнасць за дзеянні, накіраваныя на прычыненне шкоды нацыянальнай бяспецы Беларусі, у тым ліку за заклікі, накіраваныя на прымяненне санкцый у дачыненні да Беларусі, фізічных і юрыдычных асоб краіны.
Раней Белаконеў тлумачыў навацыі ў артыкуле. Па яго словах, у той час, калі пісалі фармулёўку артыкула, «першапачаткова не было такіх паняццяў, як глабальная сетка Інтэрнэт, Twitter, Facebook. Мы бачылі, што адбывалася ў 2020 годзе, пачынаючы з 9 жніўня, як адбываліся ўсе гэтыя заклікі».
«Таму па першай частцы — за заклікі да звяржэння канстытуцыйнага ладу, захопу ўлады, заклікі да тэрарыстычных актаў, рознага роду праяваў, у тым ліку і прымянення абмежавальных санкцыйных мер да самой дзяржавы, да фізічных, юрыдычных асоб — будуць карацца пазбаўленнем волі да 6 гадоў [было да 5 гадоў].
Другая частка — у асноўным гэта заклікі да замежнай дзяржавы. Гэта значыць, калі нейкі чалавек звяртаецца да ЕС, да нейкага дзяржавы і просіць, каб увялі санкцыі супраць яго краіны, дзе ён пражывае, — да 10 гадоў [было да 5 гадоў].
І трэцяя частка: калі гэта ажыццяўляецца з выкарыстаннем глабальнай сеткі Інтэрнэт, СМІ, з выкарыстаннем свайго службовага становішча службовай асобай і гэта пацягнула цяжкія наступствы, то пакаранне ўжо становіцца больш сур'ёзным: ад 4 да 12 гадоў» [было ад 2 да 7 гадоў], — тлумачыў Белаконеў.
Каментары