«На найбліжэйшыя 3 гады буду рабом». Асудзілі яшчэ аднаго ўдзельніка маршу ў Курапаты
Суддзя суда Заводскага раёна горада Мінска Дзмітрый Астапенка 3 лютага агучыў прысуд у дачыненні да Івана Зубко. Яго прызналі вінаватым у актыўным удзеле ў групавых дзеяннях, якія груба парушаюць грамадскі парадак, што пацягнула парушэнне працы грамадскага транспарту (частка 1 артыкула 342 Крымінальнага кодэкса РБ). Прысуд — тры гады абмежавання волі з накіраваннем у выпраўленчую ўстанову адкрытага тыпу. Менавіта столькі прапаноўвала дзяржабвінаваўца Кунцэвіч, паведамляюць праваабаронцы.
У гэты тэрмін залічваецца тэрмін знаходжання Івана Зубко пад арыштам падчас следства — з 16 лістапада 2020 года да 3 лютага 2021 года з разлікам адзін дзень пад арыштам роўны двум дням «хіміі». Меру стрымання Івана змянілі на падпіску аб нявыездзе — і адпусцілі пасля вынясення прысуду.
Акрамя таго, у прысудзе ўлічылі права на задавальненне грамадзянскага пазову і пастанавілі перадаць гэтае пытанне на разгляд (гаворка ідзе пра шкоду «Мінсктрансу», якая раней была ацэненая ў 10 689 беларускіх рублёў). Пакуль пазоў не разгледжаны, на канфіскаваныя мабільны тэлефон і планшэт Івана накладзены арышт.
Нагадаем, Івана Зубко затрымалі 1 лістапада 2020 года падчас нядзельнага маршу. Пратэстоўцы выйшлі на праспект Незалежнасці, што і пацягнула, на думку абвінавачвання, спыненне грамадскага транспарту і ўрон «Мінсктрансу». Абаронца Івана Зубко адзначала падчас спрэчкі бакоў, што праспект быў перакрыты і з-за спецаўтатранспарту супрацоўнікаў АМАП.
«На найбліжэйшыя тры гады стану рабом», — сказаў Іван Зубко, ацэньваючы прысуд.
Таксама Іван Зубко распавёў абставіны свайго затрымання па крымінальнай справе: калі ён 16 лістапада вярнуўся дадому пасля 15-сутачнага адміністрацыйнага арышту (вынесенага таксама за ўдзел у Маршы 1 лістапада), то «літаральна праз дзве хвіліны прыйшлі супрацоўнікі» — з тых часоў Іван заставаўся пад вартай.
Па падзеях 1 лістапада 2020 года была заведзеная адразу 231 крымінальная справа ў дачыненні да ўдзельнікаў пратэстаў.
-
Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве
-
«Можа, Корж мяне і не памятае». Нобелеўскі лаўрэат Алесь Бяляцкі расказаў, адкуль ведае Ваню Дзмітрыенку і Макса Каржа
-
Прапагандысты спыталі ў беларусаў, ці не варта ў краіне заблакаваць YouTube
Цяпер чытаюць
Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве16
Каментары