МВФ рэзка пагоршыў прагноз наконт стану эканомікі Беларусі ў 2009 годзе

МВФ рэзка пагоршыў прагноз наконт стану эканомікі Беларусі ў 2009 годзе. Згодна з надрукаваным аглядам сусветнай эканомікі, сёлета Беларусь чакае рэцэсія і падзенне ВУП на ўзроўні 4,3%.

У 2010 г. рост эканомікі, на думку МВФ, адновіцца, аднак будзе вельмі нязначным — на узроўні 1,6%.

Яшчэ чатыры месяцы таму МВФ і ўлады Беларусі падпісалі мемарандум, у якім пагадзіліся з больш аптымістычным прагнозам — у 2009 г прагназаваўся рост ВУП на ўзроўні 1,4%, у 2010 — 2,3%.

Скарэктаваная ацэнка МВФ, якая не абяцае нічога добрага, прадказвае рэцэсію і падзенне ВУП на 4,3%, кантрастуе з нядаўнімі, поўнымі надзей і аптымізму, заявамі беларускіх высокапастаўленых чыноўнікаў,

што ўжо ў другім квартале гэтага году сітуацыя палепшыцца настолькі, што па канец году можна будзе рэальна казаць пра выкананне дакрызісных прагнозных паказчыкаў, якія прадугледжваюць рост ВУП на ўзроўні 10‑12%.

Прыблізна 29 красавіка ў Мінск прыяжджае чарговая місія МВФ, якая заслухае справаздачу аб праробленай працы за першы квартал. На аснове гэтай справаздачы будзе прынятае рашэнне аб выдзяленні Беларусі другога транша крэдыту stand‑by у памеры 400 млн. даляраў ЗША.

Відавочна, што заўвагаў у МВФ будзе больш чым дастаткова і перамовы будуць няпростымі.

Несумненна, сённяшняя публікацыя МВФ халодным душам ацверазіць многіх беларускіх чыноўнікаў, у якіх засталося крыху менш за тыдзень, каб падрыхтавацца маральна да чарговага двубою.

А рыхтавацца ёсць да чаго. Абноўленая ацэнка МВФ найхутчэй грунтуецца на звестак работы беларускай эканомікі ў студзені‑лютым.

Як бы не маліліся беларускія чыноўнікі, другі квартал краіна скончыць значна горай. Пра трэці квартал нават думаць не хочацца.

Можна толькі здагадвацца, які ў гэтым выпадку падзенне ВУП РБ па выніках 2009 г спрагназуе МВФ. Але МВФ не абяцае нічога прыемнага і нашым асноўным гандлёвым партнёрам.

У цэлым зніжэнне эканомік краін СНД, згодна з прагнозам МВФ, у 2009 г складзе 5,1%, у 2010 г СНД чакае рост на 1,2%. Пры гэтым зніжэнне ВУП Украіны ў 2009 г прагназуецца на ўзроўні 8% пры росце на 1% у 2010. Скарачэнне эканомікі Казахстану ў 2009 г прагназуецца на ўзроўні 2% пры росце ў 1,5% у 2010 годзе. Спад ВУП Расіі па выніках гэтага году складзе 6% пры росце 0,5% у 2010 годзе.

І менавіта пераважна ў гэтыя краіны сыходзіць несыравінны беларускі экспарт. Прагноз МВФ сведчыць пра тое, што было б наіўным чакаць аднаўлення попыту на гэтых рынках.

afn.by

• 0
• 0
• 0
• 0
• 0
• 0
• 0
• 0