Начальнік Генштаба выказаўся пра «Захад-2017»: згадаў «Правы сектар», папракнуў НАТА, паабяцаў вывад расійскіх войскаў
Міністэрства абароны правяло 29 жніўня брыфінг для СМІ і замежнага дыпламатычнага корпуса, на якім намеснік міністра абароны — начальнік Генеральнага штаба Алег Белаконеў выступіў з тлумачэннем пра сумесныя з Расіяй вучэнні «Захад-2017».
Белаконеў будзе кіраваць беларускай групоўкай войскаў. Фармат сустрэчы не прадугледжваў пытанняў з залы, выступаў толькі генерал-маёр.
Напачатку Белаконеў звярнуў увагу на няпростую ваенна-палітычную сітуацыю ў рэгіёне.
«Каля нашых заходніх межаў створаныя перадавыя цэнтры НАТА, колькасць сіл павялічана з 25 да 40 тысяч. Чатыры тактычныя групы прыведзеныя ў гатоўнасць, у Польшчы размешчаная танкавая брыгада ЗША. Каля 8 тысяч салдат, 72 танкі, 250 баявых машын, 16 гаўбіц, 17 верталётаў. Ідзе засваенне новага тэатра ваенных дзеянняў, колькасць вучэнняў павялічылася ў два разы, а колькасць войскаў павялічылася ў чатыры разы», — сказаў ён.
Адметнай была заключная фраза апісання НАТАўскіх сіл і менеўраў: «Беларусь не бачыць у гэтым пагрозы нацыянальнай бяспецы і ставіцца адэкватна», — сказаў Белаконеў.
«Але нам няясны ажыятаж у сувязі з вучэннямі Захад-2017. Напрыклад, «Анаконда» была буйнейшым вучэннем з часоў заканчэння халоднай вайны. І ўсе паказчыкі «Анаконды» па колькасці войскаў і тэхнікі перавышаюць вучэнні ў Беларусі ў два разы. Вучэнні не насілі сяброўскі характар: была задзейнічана разведка, вялася адпрацоўка задач наступальнай тэматыкі. Але такога ажыятажу ніхто не ўздымаў», — сказаў ён.
«Але Беларусь не выказвала папрокаў у агрэсіўнасці, мы ставімся да гэтага, як да элементу падрыхтоўкі войскаў. Чаму адзін бок бачыць у гэтым негатыў, а іншы — не? Неадэкватна рэагаваць на вучэнні не зусім правільна. У паўночнай частцы Ровенскай вобласці «Правы сектар» плануе размясціць атрады з мэтай недапушчэння ўварвання ўзброеных сіл РФ у час «Захаду-2017». Гэта здаецца смешным, мы рэагуем спакойна. Калі нашыя войскі знаходзяцца на вучэннях у Расіі, то ніхто ж не прагназуе міфічную акупацыю расійскіх тэрыторый, як гэта падаецца асобнымі аналітыкамі ў дачыненні Беларусі», — закрануў тэму асноўцых асцярог грамадскасці Белаконеў.
«Я чытаў аналітыкаў гэтак званых, нібыта мы збіраемся развязаць вайну з усімі суседзямі, а Расія для гэтага стварае наступальную групоўку на нашай тэрыторыі. Нагодай для гэтага стаў адкрыта апублікаваны дзяржзаказ па аб'ёме ваенных перавозак у 4162 вагоны.
Чатыры тысячы вагонаў гэта паўтары мотастралковыя дывізіі. Я б глянуў на таго дзеяча, які вырашыў б здзейсніць акупацыю такімі сіламі.
Ён бы ўвайшоў у кнігу рэкордаў Гінеса як сумасброд і авантурыст», — сказаў генерал-маёр.
Які будзе план вучэнняў?
У аснову сюжэта пракладзена «ўзрастанне актыўнасці міжнародных сепаратысцкіх арганізацый, што маюць знешнюю падтрымку».
Чытайце таксама:
«Вейшнорыя», «Весбарыя» і «Лубенія» нападаюць на Беларусь і Расію — сцэнар вучэнняў «Захад-2017»
Адметна таксама, што большасць палігонаў, абраных для вучэнняў, знаходзяцца далёка ад межаў краін ЕС.
Таксама Белаконеў паабяцаў, што пасля вучэнняў уся расійская тэхніка і жывая сіла да 30 верасня пакіне тэрыторыю Беларусі.
Цяпер чытаюць
Скандал у полацкай школе: маці сцвярджае, што яе сына збілі на трэніроўцы па дзюдо — так хлопца «выхоўваў» трэнер12
Каментары