Былога дырэктара «Мінаблаўтатранса» прысудзілі да 5 гадоў калоніі
Суд прысудзіў былога міліцыянта і гендырэктара ААТ «Мінаблаўтатранс» Віктара Русака да пяці гадоў калоніі ўзмоцненага рэжыму. Яго маёмасць будзе канфіскавана.
Віктара Русака абвінавачвалі па пяці артыкулах Крымінальнага кодэкса. Паводле версіі следства, ён купляў за кошт прадпрыемства мэблю, тэхніку, адпраўляў сваіх супрацоўнікаў у працоўны час працаваць у сябе на дачы. Сума шкоды склала 21,5 тысячы даляраў.
На думку дзяржабвінаваўцы, віна Віктара Русака, былога кіраўніка «Мінаблаўтатранс», цалкам даказаная. Пракурор прасіў прысудзіць яго да 6 гадоў пазбаўлення волі, канфіскаваць усю маёмасьць абвінавачанага і аштрафаваць яго на 200 базавых велічынь (4600 рублёў).
Прысуд суда быў менш жорсткім - 5 гадоў калоніі ўзмоцненага рэжыму і канфіскацыя маёмасці.
Cам былы чыноўнік і яго адвакат не згодныя з многімі пунктамі абвінавачвання і прасілі не пазбаўляць волі.
— На працягу ўсяго свайго жыцця я імкнуўся дзейнічаць у рамках закона і інтарэсах службы. Сумленна выконваў свае службовыя абавязкі. Калі я быў начальнікам органа ўнутраных спраў, на працягу сямі гадоў работнікам бясплатна было выдзелена 132 кватэры. Дзякуючы сваёй жыццёвай актыўнай пазіцыі ў маі 1990 года быў абраны жыхарамі Цэнтральнага раёна дэпутатам Вярхоўнага савета XII склікання, — звярнуўся ў сваім апошнім слове да суда Віктар Русак. — Сапраўды гэтак жа я актыўна стаў працаваць на пасадзе гендырэктара ААТ «Мінаблаўтатранс», прадпрыемства з стратнага ператварылася ў прыбытковае. Мне хацелася б, каб усе вышэй сказанае было ўлічана судом. Хоць я выдатна разумею, што такі паслужны спіс не можа пры прыняцці рашэння быць важкім з-за маіх глупстваў, правін, якія я зрабіў у заканчэнні сваёй працоўнай дзейнасці. Я вінаваты перад грамадствам і дзяржавай, прашу прабачэння за зробленае. Чыстасардэчна раскайваюся і прашу вас ўлічыць адбыцця мною пакаранне (два гады) і не пазбаўляць мяне волі.
Каментары