Апытанне выбарцаў паказала, што Клінтан добра правяла і другі раўнд дэбатаў з Трампам. Згодна з вынікамі апытанкі CNN/ORC 57% выбарцаў палічылі пераможцам Клінтан, а 34% — Трампа.
У выніку гэтага ўмацаваўся мексіканскі песа. Лічыцца, што перамога Трампа прывяла б да абвалу мексіканскай эканомікі, бо кандыдат-рэспубліканец выступае супраць існавання зоны вольнага гандлю з Мексікай, таму мексіканскую валюту лічаць індыкатарам шанцаў мільярдэра.
Дэбаты былі гарачымі. Трамп заявіў, што, калі пераможа, пасадзіць Клінтан у турму за яе выкарыстанне прыватнага э-мэйла для перапіскі па службовых пытаннях у часе працы дзяржаўным сакратаром ЗША. У сваю чаргу, Клінтаніха назвала Трампа непрыдатным для прэзідэнцтва, бо здольным пасварыцца з усімі і з кожнай нагоды.
Дэбаты былі арганізаваныя ў так званым «ратушным стылі», калі кандыдаты вольна ходзяць па сцэне. Трамп часта станавіўся ў Клінтан за спінай. Карыстальнікі амерыканскіх сацсетак гэта заўважылі і ў большасці такую пагрозлівую манеру асудзілі.
Трамп таксама адбіваўся ад абвінавачванняў у вульгарных выказванняў пра жанчын. «Гэта такі жарт з раздзявальні, — некалькі разоў паўтарыў ён. — Ваш муж горшае з жанчынамі рабіў», — сказаў ён суперніцы.
Клінтан адмовілася абмяркоўваць паводзіны мужа.
На пачатку дэбатаў палітыкі адмовіліся паціснуць адзін аднаму руку. Гэта рэдкі выпадак такой узаемнай пагарды ў амерыканскай палітыцы.
Цяпер чытаюць
Бяспалаў канчаткова рассварыўся з Ціханоўскім: Для яго добры толькі адзін чалавек — Пракоп'еў85
Каментары