Фатограф, выставу якога ў Маскве спрабавалі сарваць: «Гэтая серыя нясе цалкам антываенны пасыл»
Беларускі фатограф, выставу якога ў Маскве спрабавалі сарваць, выказаў сваё расчараванне, але адначасова і ўпэўненасць у справядлівасці таго, што робіць. «Гэтая серыя нясе цалкам антываенны пасыл. Таму яе не любяць прыхільнікі вайны з абодвух бакоў», — сказаў Аляксандр Васюковіч «Нашай Ніве».
Нагадаем, што выстава здымкаў беларускага фатографа Аляксандра Васюковіча ў Маскве была азмрочаная інцыдэнтам.
Выстава прайшла ў Сахараўскім цэнтры, выстаўлены былі работы з праекта «Фота на памяць».
Васюковіч паказаў публіцы фатаграфіі ўкраінскіх вайскоўцаў, зробленыя ў зоне антытэрарыстычнай аперацыі ва Украіне. Асаблівасць фотаў у тым, што на іх адзначана, каторы з воінаў загінуў.
28 верасня ў будынак уварваўся чалавек, які абліў некалькі фатаграфій фарбай з балончыкаў. Ён назваў сябе як «кандыдат філасофскіх навук, мастак Антон Белікаў».
«На фота беларускага аўтара ўкраінскія карнікі, які ладзілі правакацыі ў Крыме і заклікалі знішчыць ДНР і ЛНР», — «тлумачыцца» на сайце тэлеканала РЭН-ТВ.
«Застенчивый фашист, улыбчивый гаденыш», — зневажаў беларускага фатографа нападнік.
Адміністратары выставы выклікалі паліцыю.
Цікава, што ў Беларусі і Украіне гэты праект Васюковіча выклікаў крытыку некаторых людзей у сацыяльных сетках. Фатографа дакаралі, што ён паказаў людзей ахвярамі, а не героямі.
«Шкада, што людзі не спрабуюць разабрацца ў чымсьці, а бачаць, тое, што хочуць бачыць. Гэта проста яшчэ адно сведчанне таго, у які час мы жывём, — сказаў фатограф Аляксандр Васюковіч «Нашай Ніве». — Ну і вельмі радуе, што знайшоўся толькі адзін такі чалавек, а на адкрыцці і сустрэчы са мной прыйшло людзей значна больш. Ніякага страху я не адчуваю, — падкрэсліў Васюковіч. — Калі мне трэба будзе зноў ехаць у Маскву, то я паеду. Гэтая серыя нясе цалкам антываенны пасыл. Таму яе не любяць прыхільнікі вайны з абодвух бакоў», — адзначыў фатограф.
* * *
Каментары