На «развітанне» ўраган жалезнай касой прайшоўся па Віцебшчыне: вырваныя з коранем дрэвы, сарваныя дахі, абясточаныя вёскі ФОТЫ
Моцны вецер, які пранёсся ўвечары 13 ліпеня па ўсходняй частцы Віцебскай вобласці, пакінуў пасля сябе сур'ёзныя наступствы ў выглядзе паваленых дрэваў, знесеных дахаў і абясточаных вёсак.
Па дадзеных МНС рэгіёну, без дахаў засталіся каля 30 жылых дамоў у Оршы, Віцебскім, Шумілінскім, Талачынскім і Дубровенскім раёнах. Пашкоджаны дах у Дубровенскай райбальніцы. Жыхароў з пацярпелых хат не адсялялі.
Наступствы непагадзі ліквідуюць больш за 250 работнікаў розных арганізацый, 83 адзінкі тэхнікі, у тым ліку сілы МНС. Асноўныя дарогі ад паваленых дрэваў ужо расчысцілі.
Па дадзеных «Віцебскэнерга», адбылося аварыйнае адключэнне 9 ліній электраперадачы, 123 трансфарматарных пунктаў у Бешанковіцкім і Віцебскім раёнах. Тут абясточаны 52 населеныя пункты і ферма. Наступствы стыхіі ліквідуюць 37 брыгад спецыялістаў.
Партал orsha.eu ацэньвае сённяшні ўраган як «самы моцны як мінімум за апошнія 50 гадоў» у Оршы.
Паводле звестак рэсурсу, стыхія ў асноўным накрыла заходнюю частку горада. Асабліва пацярпеў раён каля дома састарэлых.
У Оршы пашкоджаны дахі многіх дамоў, вецер вырываў і ламаў дрэвы, валіў платы, лініі электраперадач.
Моцна пацярпелі і тры вёскі пад Віцебскам - Мазалава, Хайсы, Букаціна. У двух апошніх вецер паваліў дрэвы, а ў Мазалаве часткова або цалкам знёс дахі 15 дамоў, дах на ферме прадпрыемства «Мазалавагаз». Гэты населены пункт застаўся без святла.
На трасе Віцебск — Гарадок у раёне вёскі Хайсы вецер паваліў сотні дрэў. Расчысткай дарогі займаліся супрацоўнікі МНС.
Цяпер чытаюць
У рэстаране «Мак.бай» на загад Лукашэнкі перайменавалі амерыкана. Як назвалі?22
Каментары