Вярхоўная рада Украіны прыняла апошнія тры законы, якія ўваходзяць у так званы бязвізавы пакет, неабходны для лібералізацыі візавага рэжыму з Еўрапейскім саюзам.
У прыватнасці, на пасяджэнні дэпутаты прынялі закон «Аб пракуратуры», якім начальніку Антыкарупцыйнай пракуратуры перадаюцца паўнамоцтвы па прызначэнні кіраўнікоў яе падраздзяленняў і іх намеснікаў ад генеральнага пракурора. Дакумент закліканы ўдасканальваць працэдуру адбору кіруючага складу гэтай пракуратуры і «павысіць гарантыі яе незалежнасці і бесстароннасці».
Таксама рада прыняла ў цэлым закон аб удасканаленні працэдуры арышту маёмасці і інстытута спецыяльнай канфіскацыі. Прынятым сёння дакументам народныя дэпутаты ўдакладнілі, на падставе якіх рашэнняў суда прымяняецца спецыяльная канфіскацыя, пашырылі выпадкі прымянення арышту маёмасці.
Трэці закон — аб выяўленні, вышуку і кіраванні актывамі, атрыманымі ад карупцыйных і іншых злачынстваў, стаўся апошнім, які, на думку дэпутатаў, адкрые Украіне бязвізавы рэжым з ЕС.
Прэзідэнт Украіны Пятро Парашэнка ўжо падзякаваў парламентарыям за прыняцце гэтых законаў. «Удзячны дэпутатам за плённы пленарны вечар і за прыняцце» бязвізавых законаў», — напісаў ён у Twitter.
Каментары