Z usioj krainy

z usioj krainy

Baraćba z šalenstvam

Kaardynacyjnaja rada pa prafilaktycy šalenstva stvorana pry Aršanskim harvykankamie. Padstavaj dla hetaha stała śmierć maładoha mužčyny. Jašče ŭviesnu jon pałaščyŭ niejkaha prybłudnaha sabaku. Toj “adździačyŭ”, capnuŭšy za ruku. Mužčyna asablivaj uvahi hetamu nie nadaŭ, a daremna — sabaka byŭ šalony. Inkubacyjny peryjad chvaroby doŭžycca ad 10 dzion da hodu. U aršanca jon skłaŭ čatyry miesiacy, i vyratavać jaho žyćcio daktary ŭžo nie mahli. Stvoranaja rada abaviazała ŭładalnikaŭ sabakaŭ dy katoŭ štohod rabić im pryščepki ad šalenstva. U vieraśni—kastryčniku budzie praviedzieny adłoŭ dy adstreł sabakaŭ, jakich zaŭvažać na vulicach biez haspadaroŭ.

Aŭtobus i “Kaciuša”

Aršanski aŭtobus №3, što kiravaŭsia z Zadniaproŭja ŭ centar, raptam straciŭ kiravańnie, pakaciŭsia z hary, pierasiok pałasu sustrečnaha ruchu i ŭźjechaŭ na ŭzvyšša da pomnika “Kaciušy”. Pa inercyi daŭ nazad i byŭ spynieny bardziuram. Jak vyśvietliłasia, kiroŭca aŭtobusa na niejki momant straciŭ prytomnaść. Niekiroŭnaja mašyna paniesłasia z hary da mostu cieraz Dniapro. Adnak pa ščaślivaj vypadkovaści źviarnuła ŭbok. Praŭda, na svaim šlachu jana źbiła mužčynu, jaki jechaŭ na rovary (dziakujučy ŭdałaj šmathadzinnaj aperacyi jaho žyćcio ŭratavanaje.)

Abrabavali chram

Užo treci raz za dva hady isnavańnia abrabavanaja carkva Rastva Chrystovaha, što mieścicca la čyhunačnaha vakzału Voršy. Skradzienyja hrašovyja achviaravańni dy ŭračystaje adzieńnie śviatara. Padazrajucca padletki — vidać, budučyja “parafijanie” ajca Alaksandra Charłamava, hałoŭnaha turemnaha śviatara Viciebskaj japarchii.

Viktar Lutynski, Vorša

Vykładajuć pa-rasiejsku

Letaś histaryčny fakultet Haradzienskaha ŭniversytetu adčyniŭ biełaruskamoŭnuju płyń. Sioleta ŭžo dva kursy majuć mahčymaść vučycca całkam na rodnaj movie. Adnak mnohija vykładčyki admaŭlajucca čytać lekcyi pa-biełarusku. Kiraŭnictva fakultetu nia vielmi zvažaje na heta, tamu navat na biełaruskamoŭnaj płyni praktyčna daminuje rasiejskaja mova vykładańnia.

Pra adnosiny ž studentaŭ da “druhoj dziaržaŭnaj” jaskrava śviedčać vyniki pastupleńnia. Konkurs na biełaruskamoŭnuju płyń skłaŭ amal 3 čałavieki na miesca, u toj čas jak na rasiejskamoŭnuju byŭ niedabor. Kab dakamplektavać niepapularnuju hrupu, administracyja amal hvałtam pieraviała dziasiatak studentaŭ na płyń z rasiejskaj movaj navučańnia.

Źmicier Alaškievič, Horadnia

U pryniomanskim miastečku Bielica aktyvisty BNF i TBM ustalavali siamimetrovy dubovy kryž i kamienny znak u pamiać pra niaroŭny abarončy boj 1659 h. Tady tut, la brodu praź Nioman, trochtysiačnaje rušańnie lidzkaje šlachty strymała nastup udziesiaciora bolšaha rasiejskaha vojska.

Harać leciščy

Novy kłopat źjaviŭsia ŭ pinčukoŭ. U piatnicu, 13 vieraśnia, pačaŭsia pažar na bałocie, jakoje padychodzić da leciščaŭ čalcoŭ sadovaha tavarystva “Aziornaje”. Užo zhareŭ čarot, zaniaŭsia torf. Usie vychodnyja dačniki kapali tranšei i pilnavali, kab ahoń nie spaliŭ ich chaty. Siabry sadovaha tavarystva viedajuć, chto zapaliŭ bałota, adnak u dziaržaŭnyja orhany nie paviedamlajuć. Napeŭna, buduć raźbiracca sami.

Stojła dla handlaroŭ

Dyrektar HUP “Kaaprynak” P.Prakopčyk padrychtavaŭ prajekt rekanstrukcyi dvuch rynkaŭ, jakija naležać hetaj arhanizacyi. Zamiest siońniašnich handlovych namiotaŭ jon planuje pastavić kantejnery z raletami. Pieraabstalavańnie budzie kaštavać kožnamu handlaru 1832 dalary. Tym, chto admovicca płacić, daviadziecca sychodzić z rynku. Usie novyja pabudovy, trapna nazvanyja “stojłam”, buduć naležać HUP “Kaaprynak”. Handlary aburajucca, kažuć što takija kantejnery ŭ Polščy značna tańniejšyja.

Vasil Mackievič, Pinsk

Streł u akno

A 6-j ranicy 9 vieraśnia ū akno kvatery pa vuł.Kamarova ū Baranavičach niechta streliū. Byū paranieny 30-hadovy haspadar, jaho špitalizavali. Milicyjanty vyśviatlajuć, chto, z čaho i čamu stralaū.

Rusłan Raviaka, Baranavičy