Naviny za tydzień

Naviny za tydzień

Bierazoŭskaha chočuć pasadzić

Maskoŭskaja prakuratura vydała order na aryšt rasiejskaha aliharcha Barysa Bierazoŭskaha — taho samaha, jaki niekali pracavaŭ vykanaŭčym sakratarom SND u Miensku i abaraniŭ Biełaruski humanitarny licej ad zakryćcia. Vinavaciać jaho ŭ złoŭžyvańniach padčas kiravańnia rasiejskim “Aeraflotam”. Aryštavać Bierazoŭskaha moža tolki Interpoł, bo jon zaraz žyvie na emihracyi ŭ Francyi.

Padvodny kryminał

Na Cichaakijanskim flocie Rasiei čatyry pjanyja matrosy terminovaj słužby, što nieśli načnuju vachtu, zachapili padłodku i ŭziali ŭ zakładniki dziažurnaha aficera. Usiu noč jany trymali čovien začynienym i ździekavalisia z zakładnika. Ranicaj, praćvierazieŭšy, zdalisia.

Zabili sudździu z Ryhi

U Ryzie zabili sudździu akruhovaha sudu Janisa Łaŭkroze. Jon staršyniavaŭ na šerahu pracesaŭ, źviazanych z handlem narkotykami, razhladaŭ spravu ryskaha amonaŭca Siarhieja Parfionava, a sioleta ŭ krasaviku daŭ ad 5 da 15 hadoŭ turmy trom aktyvistam rasiejskaj nacyjanał-balšavickaj partyi, što ŭ listapadzie 2000-ha zachapili zvanicu saboru Śv.Piatra ŭ Staroj Ryzie. Specsłužby ličać, što zabojstva sudździ — zamoŭlenaje.

S.M.

Pryznańnie pahanstva

Hrupa litoŭskich parlamentaroŭ prapanuje pryznać pahanstva tradycyjnaj litoŭskaj relihijaj. Adpaviednuju papraŭku da Zakonu ab relihijnych supołkach i hramadach padali ŭ sakrataryjat Sojmu hrupa sacyjał-liberałaŭ, liberałaŭ i siabar Partyi nacyjanalnaha prahresu. “Vučeńnie i abrady staradaŭniaj relihii bałtaŭ nie piarečać zakonu i marali, a padtrymku ŭ hramadztvie staradaŭniaja relihija bałtaŭ maje bolšuju, čym pryznanyja zakonam relihijnyja supołki judziejaŭ, musulmanaŭ-sunitaŭ i karaimaŭ”, — havorycca ŭ tłumačalnym liście.

U siaredzinie 90-ch hetkija sproby rabili i łatvijskija zakanatvorcy, pryčym ŭ Łatvii pahanstva karystajecca bolšaj padtrymkaj, čym u Litvie.

Naš nacyjanalny schod takich pytańniaŭ nie razhladaje. Pa acenkach biełaruskich pahancaŭ, kolkaść ichnych adzinaviercaŭ nie pieravyšaje niekalkich sotniaŭ čałaviek, padzielenych na kolki hrupovak, siarod jakich jość navat eŭrazijska-prarasiejskaja. Samy ŭpłyvovy centar pahanstva — Navapołacak. U Miensku dziejničajuć dźvie supołki — “Javar” dy “Kryŭja”. Apošniaja maje radykalny charaktar. “Javar”, prykładam, zarehistravany jak hramadzkaje abjadnańnie, a “Kryŭja” admaŭlajecca addavać sučasnaj śvieckaj dziaržavie prava na ŭmiašalnictva ŭ relihijnyja spravy. Ideałam dla ich jość teakratyčnaja dziaržava — ź pieršaśviatarom na čale.

A.Pros.

Dva kapitany-2

Zinovi Marholin zrabiŭ dekaracyi da samaha maštabnaha mjuzykłu sezonu ŭ Maskvie.

U Maskvie 19 kastryčnika adbyłasia aficyjnaja premjera spektaklu “Nord-Ost” — klasyčnaha, tak zvanaha stacyjanarnaha mjuzykłu na rasiejskim materyjale. U vahonach metro byli rasklejenyja sotni ŭlotak-posteraŭ, radyjo rehularna paviedamlała, što roŭna ŭ 21.30 na scenu siadzie samalot-bambavik, reklama źjaviłasia navat na kvitkach metro.

Mjuzykł napisany pa matyvach ramanu Vienijamina Kavieryna “Dva kapitany”. Iści jon budzie piać razoŭ na tydzień, u zali 1150 miescaŭ, bilety kaštujuć ad adnaho da tryccaci dalaraŭ. Za hod paśpiachovaha prakatu spektakl viernie pazyki, praz dva hady možna budzie dumać pra novuju pastanoŭku.

Ryzyku aŭtary (dakładniej, adzin ź ich — biznesoviec Hieorhi Vasiljeŭ) i pradusar Alaksandar Cekała biaruć na siabie. Razam z maskoŭskim biespryzornikam, budučym ardenanosnym lotčykam i palarnym daśledčykam Saniem Hryhorjevym na scenie možna ŭbačyć pamoraŭ pačatku 1910-ch, razhublenych damaŭ uzoru 1930-ch. Hudzie, stvarajučy karnavalnuju atmasferu, maskoŭskaja “taŭkučka” pieršych hadoŭ NEPu, milhajuć lotčyki, nalotčyki, kańkabiežcy, pijanerki, tavaryš Čkałaŭ va ŭsim biełym, paŭnočnyja niency ŭ malicach, blakadniki, biezzahanny nastaŭnik Karabloŭ — uvieś saviecki i rasiejski narod va ŭsioj svajoj krasie.

Hety narod tančyć na Smalenskim bazary, bje čačotku na lotnym poli, upartym čarlstonam adhaniaje Saniu Hryhorjeva ad bramy savustanovy, valsuje na katku parku kultury, vykładajecca ŭ chvilinnych rolach (asabliva fajnyja tavaryš Čkałaŭ i ŭtrapiony dvornik-tataryn). Dekaracyi Zinoŭja Marholina mnoha dajuć spektaklu. Bambavik u parametrach frantavoha U-2 na scenu nasamreč siadaje. Ale z teatralnaha punktu hledžańnia našmat lepšaja dekaracyja kamunałki j dabitaha maskoŭskaha tramvaja epochi vajennaha kamunizmu sa znakamitaj reklamaj: “Sield́ atłantičieskaja ivasi”. (Praŭda, ivasi nasamreč vodzicca ŭ Cichim akijanie. Nu, dy dla biełarusa Marholina heta daravalna.)

Marholin z samalotam vyhladaje davoli ścipła na fonie zachodnich pastanovak. Tam na scenie mohuć zbudavać ledźvie nie pałovu staroha Paryžu (jak u mjuzykle “Adrynutyja” pavodle Hiuho), kab bližej da finału splažyć jaho ŭ pracesie revalucyjnych bajoŭ. Zatoje aktory “Nord-Ostu” daloka vypiaredžvajuć svaich zachodnich kalehaŭ tryvuščaściu: na trupu z 32 čałaviek prypadaje 380 vialikich i małych rolaŭ. U mahutnaj masoŭcy “Adrynutych” 400 rolaŭ ihrali 250 aktoraŭ.

Maskal

Zinovi Marholin

Vypusknik Biełaruskaj akademii mastactvaŭ (1982). Mastak-pastanoŭščyk bolš jak 40 spektaklaŭ u teatrach Miensku, Maskvy, Sankt-Pieciarburhu. Siarod ich “Barys Hadunoŭ” u Biełaruskaj opery i “Idylija” ŭ Kupałaŭskim.