Listy ŭ redakcyju

 Listy ŭ redakcyju

Svoj siarod čužych

Historyja ničomu nia vučyć, bo vučniaŭ u jaje niama. Jość tolki stvaralniki i statysty, jakija kirujucca adviečnymi zakonami – pieramahaje macniejšy i chitrejšy. Padziei 9 vieraśnia na Biełarusi i 11 vieraśnia ŭ ZŠA jašče raz paćvierdzili heta. Ameryka – dziaržava vialikaja, ale ci nastolki, kab razhladać prablemy Iraku, Libii ci Aŭhanistanu jak svaje ŭłasnyja? Ameryka daŭno ŭziała na siabie niebiassprečnuju misiju “suśvietnaha palicyjanta”. 11 vieraśnia apanenty Ameryki vyjavilisia chitrejšymi j jašče raz nahadali, što vialikija ambicyi patrabujuć achviaraŭ, a na siłu – rana ci pozna – znojdziecca inšaja. Tym bolš, što siła – heta nia tolki techničnaja, vajskovaja i finansavaja moc, ale i čałaviečy faktar – ludzi, ichnaja vola i pierakanańni. Hety faktar najbolš dalikatny, jamu nie daduć rady rakiety i bomby, a jon vyrašaje losy narodaŭ i dziaržavaŭ.

Padziei 11 vieraśnia navodziać na dumku, što baraćba idealohijaŭ nia źnikła, a nabyła tolki novyja formy. “Adnapolusny” śviet niemahčymy, jak i kij z adnym kancom. Niechta volaj-niavolaj zaŭsiody budzie z supraćlehłaha boku, u apazycyi. Siońnia hetaje miesca zaniali isłamskija fundamentalisty, avanhard “treciaha śvietu”. Viečnaje supraćstajańnie “biednyja-bahatyja” nabyvaje nia klasavyja, a cyvilizacyjna-relihijnyja abrysy. “Treci śviet” intehravaŭsia nie nastolki dobra, kab “dahnać” Zachad, ale dastatkova ščylna, kab zajmieć svaje intaresy i pačać ich adstojvać. “Vialikaje pierasialeńnie narodaŭ” dazvalaje prybyšam ź Blizkaha Ŭschodu nia tolki dobra ŭładkavacca, ale j spaznać słabyja miescy zachodniaha hramadztva, dastupicca da jahonych žyćciovych centraŭ, navučycca vykarystoŭvać ich pa svaim razumieńni. I razumieńnie toje vielmi adroznaje ad tradycyjnych kaštoŭnaściaŭ Zachadu. Zanadta naviaźlivyja namahańni raźvitych krainaŭ dapamahčy, navučyć i nastavić na “pravilny šlach” vyklikajuć varožaść i adčužanaść. Na žal, inšaha sposabu dačynieńniaŭ miž “pieršym” i “trecim” śvietam pakul nie pradbačycca, a prystupnaść cyvilizavanaha hramadztva dla teraktaŭ jašče doŭha budzie spakusaj dla jahonych apanentaŭ. Ale što z taho Biełarusi?

U novym suśvietnym padziele – technahiennyja demakratyi suprać charyzmatyčnych aŭtakratyjaŭ – apošnija majuć svaje demahrafičnyja i, mahčyma, idealahičnyja kozyry (jak “abaroncy“ biednych). Krainy byłoha saclahieru taksama padzialilisia miž dvuma polusami, i tolki Biełaruś zajmaje dziŭnaje stanovišča: svoj siarod čužych (na Ŭschodzie) i čužy siarod svaich (u Eŭropie). U hetym adna z zahadak biełaruskaj palityki i našaja biada. Biełaruś surjoznych niepryjacielaŭ byccam by j nia maje, ale ŭ biełaruskaha prezydenta ich davoli. A kab zmahacca ź imi, treba hrošy, jakich tak brakuje na kałhasy, darohi, lakarni, škoły, zarobki dy inš. Nia tolki lubimym, ale i darahim, zanadta darahim moža stać naš prezydent.

Jak terakty źjadnali Ameryku, tak nianaviść i złość niepryjacielaŭ množyć siły A.Ł. Dyk razydziciesia, spadarstva, rasstupiciesia, dajcie čałavieku nabyć svaje zvyčajnyja pamiery! Biaz vašych padporaŭ – kpinaŭ i padkołak – jon zavalicca chutčej, čym ad samych krutych teraktaŭ. Sapraŭdnyja ž terakty 11 vieraśnia prynieśli najvialikšuju karyść Rasiei (u čačenskim pytańni) i najvialikšuju škodu (paśla Aŭhanistanu) – Biełarusi. Tolki my zastalisia za ramkami mižnarodnaj antyterarystyčnaj salidarnaści i jašče raz paćvierdzili svoj status apošnich savieckich “talibaŭ”. Voś takija my samabytnyja, cichija i niepachisnyja, i nichto nam nia ŭkaz, bo my čužyja tut i svaje tam, dzie nas niama.

Vasil Aŭramienka

My – bolšaść

Mianie ździviŭ artykuł u “NN” ad 17 vieraśnia “Nas 25%“.

Čamu spadar aŭtar, a razam ź im i “NN”, vierać spn.Jarmošynaj? Apošniaja 9 vieraśnia adrazu paśla 20-j abvieściła vyniki pa Miensku: za Łukašenku – 75%. A ja byŭ naziralnikam na vybarach i dobra viedaju, što, naprykład, u škole №1 Miensku biuleteni ličyli hadzinu i 20 chvilinaŭ. Nie sakret, što vyniki hałasavańnia pa Kastryčnickim rajonie Miensku padbivali cełuju noč i nastupny dzień. Adkul ža ŭziała ličby Jarmošyna?

A kali ŭličyć, što źviestkam łukašenkaŭskich kamisij davieru niama?.. Naziralniki z usich učastkaŭ śćviardžajuć, što pry padliku kamisija raskładała biuleteni na 3 stosiki, a nie na 4, jak tre było. I samaje važnaje: nivodnamu naziralniku nie dali pravieryć, ci sapraŭdy ŭ stosiku za Łukašenku lažali biuleteni za Łukašenku. Nivodzin naziralnik nie pieraličvaŭ ich i navat nia bačyŭ, što na ich napisana.

Papraŭdzie vyjdzie, što NAS – 75%!!!

Aleś Radyna, Miensk