Arhanizacyja “Kraj”: “Džyp moža być zakapany na bolšaj hłybini”

 Arhanizacyja “Kraj”:
“Džyp moža być zakapany na bolšaj hłybini”

Z karespandentam “NN” źviazalisia pradstaŭniki Spartova-patryjatyčnaj arhanizacyi “Kraj”, kab prakamentavać apošnija “kasetnyja skandały” vakoł źnikłych ludziej. “Krajoŭcy” biaruć na siabie adkaznaść za vykryćci, zroblenyja Vuhlanicam i Žarnasiekam i za praŭdzivaść hetych ludziej. Tym samym, jany ryzykujuć aŭtarytetam svajoj arhanizacyi.

“NN”: Vy nieadnojčy zhadvali pra najaŭnaść u šerahach “Kraju” supracoŭnikaŭ siłavych strukturaŭ, što spačuvajuć apazycyi. A ci nia moh aktyvist “Kraju” Andrej Žarnasiek, jaki razam sa śledčym KDB Vuhlanicam śviedčyŭ pra los źnikłych palitykaŭ, vyjavicca adnym z takich ludziej?

“Kraj”: Kali ŭvažliva hladzieć tuju videakasetu, vidać: Žarnasiek nie nazyvaŭsia supracoŭnikam KDB. Svaju pasadu nazvaŭ Hienadź Vuhlanica, Andrej — tolki svajo imia. Chadzili čutki, što jon raniej słužyŭ u specpadraździaleńni “Alfa”, ale heta niapraŭda. Paprostu našaja arhanizacyja — začynienaha kštałtu, tamu ludzi z bahataj fantazijaj časam dadumvajuć detali.

“NN”: Ci možna vieryć Vuhlanicu?

“Kraj”: Jon pracavaŭ i z našaj arhanizacyjaj. Taksama dachodziła da zapałochvańnia, da pahrozaŭ padkinuć nam narkotyki... Nichto z “krajoŭcaŭ” tady nie złamaŭsia. Na samym nizavym uzroŭni arhanizacyi KDB mieŭ paru infarmataraŭ. Ale j tych my nieŭzabavie vykryli.

“NN”: Z Vašych tłumačeńniaŭ vynikaje, što Žarnasiek “pieraverbavaŭ” Vuhlanicu na Vaš bok?

“Kraj”: My ŭvieś čas sprabavali razmaŭlać z tymi, chto vyklikaŭ nas dla “prafilaktyčnych hutarak”, z Hienadziem Vuhlanicam taksama. Spačatku nie było bačna vynikaŭ tych razmovaŭ. Ale ŭ 2000-m užo byli spravy pa źniknieńniach ludziej, jakija mieli vielmi vialiki rezanans. Aficery KDB vydatna ŭsio razumiejuć. Im nia treba tłumačyć, što adbyvajecca ŭ Biełarusi. My znajšli parazumieńnie z Vuhlanicam, a šerah našych kankretnych spravaŭ kančatkova pierakanaŭ jaho, što z nami možna supracoŭničać.

“NN”: Dzie zaraz znachodziacca aŭtary videakasety?

“Kraj”: Za miežami Biełarusi. I ź imi ŭsio dobra. A to KDB raspaŭsiudžvaŭ infarmacyju, byccam Žarnasiek Vuhlanicu vykraŭ. Heta łuchta. Miarkuju, užo ŭ chutkim časie jany paćvierdziać praŭdzivaść svaich słovaŭ, skazanych pierad videakameraj.

“NN”: Žarnasiek i Vuhlanica kažuć, što milicyjanty z Partyzanskaha RUUS stalicy skanfiskavali niejkaje abstalavańnie, nieabchodnaje Vam dla pracy.

“Kraj”: Tak, my mieli vielmi dobry metaładetektar, jaki “adčuvaje” metalovyja pradmiety na hłybini da 6 metraŭ, a taksama prybory načnoha bačańnia, radyjostancyi, kamuflažy. Usio heta było patrebna dla pracy na pałasie pieraškodaŭ, dzie zakapanaja taja mašyna. Pałasa pieraškodaŭ mieścicca amal la samaj vajskovaj častki, i my vydatna razumieli, jak ryzykujem, pracujučy tam. U jamie my, z dapamohaj pryboru, vyrazna razhledzieli kontur aŭtamabila. A taksama — abryŭ, jaki śviedčyŭ, što ŭ jamu zajaždžaŭ BTR, jakim źvierchu pluščyli džyp. Potym my u dvuch roznych miescach jamy prakapali šurfy, i pryblizna na adnolkavaj hłybini sapiornaja rydloŭka hrukała pa metale.

“NN”: Čamu tady žurnalisty, što jeździli tudy z vyjaznoj hrupaj śledztva, ničoha nie pabačyli? BT vielmi aperatyŭna pakazała hetaje “rasčaravańnie presy”.

“Kraj”: Pa-pieršaje, na toje jano i BT — što jašče moža pakazać telebačańnie režymu? Pa-druhoje, hetaja banda ŭžo zamiała ślady. Jany vykapali ź jamy aŭtamabil i pierachavali. A mo džyp i dahetul znachodzicca ŭ jamie, ale lažyć na bolšaj hłybini, čym taja, na jakuju prakapali j pakazali žurnalistam. Uličym taksama, što prybor, jakim karystalisia sapiory j śledčaja bryhada, što vyjaždžali pad Biahoml, “bje” tolki na hłybiniu da 1,5 metraŭ. Dziaržava maje j lepšaje abstalavańnie, ale ŭłada siońnia nie zacikaŭlenaja ŭ jahonym prymianieńni: idziecca pra prostyja dokazy złačynnaj dziejnaści hetaj ułady.

Hutaryła Taciana Śnitko

Nia vieru!

Pavał Karnazycki — były lider Maładoj Hramady, palityčny ŭciakač. Žyvie ŭ Kijevie. U 1997 h. kadebisty Čyž i Vuhlanica šantažavali jaho, dabivajučysia zhody na supracoŭnictva sa specsłužbami. Čyž nieŭzabavie skončyŭ žyćcio samahubstvam. Vuhlanica ŭspłyŭ u “kasetnym skandale”.

Pavał Karnazycki: Mianie pa-sapraŭdnamu ŭraziła tolki toje, što cieść hetaha čałavieka — Radzim Harecki... Kali mianie vyklikali ŭ KDB, Vuhlanica kazaŭ: ty navat nie zdahadvaješsia, chto ŭ mianie cieść. Uvohule, składałasia ŭražańnie, što hety čałaviek tolki choča padacca dobrańkim, ale varta było jaho trochi razzłavać — i jon adkryvaŭ sapraŭdny tvar. Vuhlanica — nie biełaruskaha pachodžańnia, jon adniekul z Rasiei byŭ kamandziravany. Ja nia vieru, što ŭ Vuhlanicu raptam pračnułasia sumleńnie. Dzie jon byŭ tady, kali skončyŭ žyćcio samahubstvam Čyž? (Małady hebist zvaliŭsia z dachu pry niavyśvietlenych abstavinach. Akramia aficyjnaj versii samahubstva, pa Miensku chadzili čutki, niby jamu “dapamahli” — “NN”.) Čamu maŭčaŭ try hady? Jašče tady Vuhlanica papiaredžvaŭ mianie, što budzie fizyčna vyniščacca apazycyja, kazaŭ pra “čornyja śpisy” i “eskadrony śmierci”. Kazaŭ, što ja taksama patrapiŭ u śpis na źniščeńnie, i tolki dziakujučy jamu nia budu źniščany. U ščyraje jaho pryznańnie pa pokličy dušy — nia vieru!