Kanhres partyjnych siłaŭ

Praviadzieńnie druhoha Kanhresu demakratyčnych siłaŭ nieadnarazova adkładałasia. Pieršapačatkova planavałasia pravieści jaho jašče pierad Dniom Voli, u sakaviku. Paźniej lider kamunistaŭ Siarhiej Kalakin nastojvaŭ, kab Kanhres adbyŭsia 21-22 krasavika — taksama nia vyjšła. Urešcie, było pryniataje rašeńnie, što demakraty źbiarucca 26-27 traŭnia, na hety raz kančatkovaje.

Doŭhi čas nie było jasnaści i z pamiaškańniem, dzie adbudziecca Kanhres. Ci dazvolać pravieści jaho ŭ Miensku? Ułady trymali paŭzu. Razhladalisia varyjanty za miažoj — Litva, Ukraina, Rasieja. Adnak užo ŭ siaredzinie traŭnia z voli Łukašenki Kanhres pahadziŭsia pryniać Pałac kultury MAZu.

Asnoŭnaje pytańnie Kanhresu zaklučajecca ŭ tym, ci varta vybirać na im adzinaha lidera apazycyi (na hetym nastojvaje Milinkievič), ci kiravać musić kalehijalnaja rada sustaršyniaŭ u składzie piaci čałaviek. Druhi padychod pieramoh na rehijanalnych schodach udzielnikaŭ Kanhresu.

A.Milinkievič adrazu zajaviŭ, što nie źbirajecca vyłučać kandydaturu ŭ sustaršyni demakratyčnaj kaalicyi. Jon ličyć, što taki sposab kiraŭnictva budzie aznačać dla apazycyi krok nazad. Milinkievič źbirajecca zasiarodzicca na tvareńni «Ruchu «Za Svabodu».

Razam z tym, A.Milinkievič nia budzie ihnaravać Kanhresu. Palityk vystupić na im ź planam stratehii dziejańnia apazycyi. Stratehiju, jakuju prapanuje Palitrada, Milinkievič ličyć małaefektyŭnaj. Jon budzie vystupać za pryniaćcie stratehii «Eŭrapiejskaj kaalicyi», jakaja praduhledžvaje «bolš aktyŭnuju pracu ź ludźmi, praviadzieńnie vuličnych akcyjaŭ, a nie kabinetnuju pracu».

Delehatami druhoha Kanhresu stanuć aktyvisty apazycyi, jakija sioleta padčas miascovych vybaraŭ naźbirali pa 300 podpisaŭ u svaju padtrymku.

Razam z tym, palitrada spačatku admoviła va ŭdziele ŭ Kanhresie VIP-personam — piśmieńnikam, pradstaŭnikam intelihiencyi, navukoŭcam, abaroncam Płoščy. Było admoŭlena va ŭdziele «maładafrontaŭcam» Naści Pałažancy i Źmitru Chviedaruku, sud nad jakimi pačynajecca na nastupny dzień paśla pasiedžańnia. Heta vyklikała rezkuju krytyku Milinkieviča, jaki nazvaŭ mierapryjemstva «kanhresam partyjnych siłaŭ».

Urešcie partyjcy źlitavalisia i pahadzilisia taki na ŭdzieł 27 intelektuałaŭ na čale z Baradulinym i Arłovym. Pytańnie tolki, ci pahodziacca paśla takoha dziejačy intelihiencyi pryjści na forum?

Pavodle papiarednich padlikaŭ, kolkaść prychilnikaŭ Milinkieviča składaje mienšaść. Adnak na jahonym baku aŭtarytet vyzvalenych Paŭła Sieviarynca i Mikoły Statkieviča, jakija rašuča padtrymlivajuć prapanovy eks-kandydata ŭ prezydenty. Vysoki maralny aŭtarytet palitviaźniaŭ budzie strymlivać partyjnych bonzaŭ.

Rehistracyja delehataŭ i haściej pačniecca ŭ subotu 26 traŭnia a 9.00. Adkryćcio Kanhresu zaplanavanaje na 13.00. Z dakładami musiać vystupić Alaksandar Milinkievič, Siarhiej Kalakin, Anatol Labiedźka, pradstaŭnik Kazulina. Paźniej pačnucca vystupy delehataŭ i haściej forumu A 20.00 skončycca praca pieršaha dnia forumu.

Nazaŭtra praca pačniecca a 9.30. Budzie hałasavańnie adnosna stratehii i prahramnych dakumentaŭ demsiłaŭ, budzie zaćvierdžanaja palitrada. A 15-j Kanhres skončyć pracu.

Praz supiarečnaść pazycyj hety Kanhres maje mała šancaŭ vyrašyć pryncypovyja mety. Kali palityčnym lideram udasca zacuhlać ułasnyja ambicyi i strymać svaich prychilnikaŭ ad eskalacyi ŭnutrykaalicyjnaha kanfliktu, heta ŭžo možna budzie ličyć pośpiecham.

Źmicier Pankaviec

Fota Biełaruś-Fota

• 0
• 0
• 0
• 0
• 0
• 0
• 0
• 0