«Status biełarusaŭ nia budzie roźnicca ad statusu čukčaŭ»
Jak rasiejskamoŭnyja palityčnyja i kulturnyja dziejačy Biełarusi staviacca da niadaŭniaha zakliku Ŭładzimiera Parfianoviča i Leanida Sinicyna, kab Biełaruś uvajšła ŭ skład Rasiei asacyjavanym členam?
Jak rasiejskamoŭnyja palityčnyja i kulturnyja dziejačy Biełarusi staviacca da niadaŭniaha zakliku Ŭładzimiera Parfianoviča i Leanida Sinicyna, kab Biełaruś uvajšła ŭ skład Rasiei asacyjavanym členam?
Siarhiej Skrabiec, były palitviazień i deputat pałaty pradstaŭnikoŭ: «Pa‑pieršaje, u nas niama nijakich ekanamičnych padstavaŭ dla takoha kroku. Rasieja — heta kraina rynkavaj ekanomiki, a ŭ Biełarusi ŭ ekanomicy nieviadoma što. Pa‑druhoje, jurydyčny aspekt, Rasieja razam z ZŠA i Vialikaj Brytanija źjaŭlajucca harantami našaha suverenitetu. I narešcie, pa‑treciaje, na heta niama nijakaha maralnaha prava. Sotni tysiač biełarusaŭ hinuli ŭ baraćbie za dziaržaŭnuju niezaležnaść. Tamu my nia možam pra heta havaryć, choć by z pavahi da hetych ludziej».
Alaksandar Adamianc, filozaf: «Adnaznačna admoŭna. Hety «Manifest» absalutna supiarečlivy. Z adnaho boku, jany za ŭvachodžańnie ŭ skład Rasiei, z druhoha — havorać pra dziaržaŭny suverenitet. Nadziei na demakratyzacyju Biełarusi z dapamohaj Rasiei nia majuć pad saboj hruntu».
Michaił Marynič,były palitviazień i ministar: «Kožny maje prava na svaju pazycyju. Razam z tym ja liču, što inicyjatyva Sinicyna i Parfianoviča biezefektyŭnaja. Siońnia treba dumać pra dziaržaŭny suverenitet, a nie pra jaho stratu. Liču «Manifest» całkam kontrapraduktyŭnym».
Valer Frałoŭ, hienerał: «Ja dobra viedaju hetych chłopcaŭ, dobra viedaju, što i chto staić za ichnimi zajavami. Liču, što hetyja prapanovy sproba niejak paŭpłyvać na adzin ź mižnarodnych subjektaŭ, jaki zdolny źmianić sytuacyju ŭ Biełarusi, to bok na Rasieju. Heta zvyčajnaja sproba nabrać palityčnyja punkty ŭ Rasiei. Ale hetyja palityki nie pieraśledujuć skurnyja intaresy, jany sapraŭdy žadajuć lepšaha našaj krainie. Asabista ja nie padtrymlivaju chłopcaŭ. Ja za niezaležnuju, suverennuju, demakratyčnuju Biełaruś, jakaja budzie mieć dobryja adnosiny z Rasiejaj. Uvachodžańnie ŭ skład Rasiei asacyjavanym členam ničym nia budzie roźnić status biełarusaŭ ad statusu čukčaŭ ci burataŭ. Bližejšym časam ja źbirajusia jašče parazmaŭlać ź Sinicynym i Parfianovičam, kab pierakanać, što abrany imi šlach pamyłkovy».
Alaksandar Vajtovič, były prezydent Akademii navuk i śpikier Savietu respubliki: «Staŭlusia rezka admoŭna. Tak nielha rabić, bo Parfianovič i Sinicyn faktyčna prapanoŭvajuć parušyć biełaruskuju Kanstytucyju i žyć u adpaviednaści z Kanstytucyjaj Rasiei. «Manifest» sumburny. Chłopcy nie padumali nad tym, što robiać».
Andrej Suzdalcaŭ, palitolah: «Kiepska pastaviŭsia. Biełaruski narod zasłužyŭ prava žyć u svaim domie, u niezaležnaj krainie. Rasieja musić taksama pavažać hety vybar biełarusaŭ i nielha ich pazbaŭlać takoj mahčymaści. Toj farmat intehracyi, jaki prapanavali Parfianovič i Sinicyn, niežyćciazdolny. Taki farmat jak asacyjavany člen moh być aktualny ŭ siaredzinie 1990‑ch, ale nie ciapier».
Kamientary