Siońnia ŭ Biełarusi pačynajecca ŭstupnaja kampanija
2 traŭnia pačynajecca rehistracyja abituryjentaŭ dla prachodžańnia centralizavanaha testavańnia.
2 maja ŭ Biełarusi startuje ŭstupnaja kampanija. Z hetaha dnia pačynajecca rehistracyja abituryjentaŭ dla prachodžańnia centralizavanaha testavańnia, paviedamili BiełaPAN u Respublikanskim instytucie kantrolu viedaŭ (RIKV).
Padać dakumienty abituryjenty mohuć da 1 červienia. Punkty rehistracyi buduć pracavać z 8.00 da 20.00 štodzionna, akramia niadzieli, a taksama ŭ vychadny dzień 27 maja.
U RIKV adznačyli, što kardynalnych źmianieńniaŭ u arhanizacyi i praviadzieńni centralizavanaha testavańnia sioleta nie budzie, pakolki, jak i letaś, jano pravodzicca ŭ adpaviednaści z Praviłami pryjomu ŭ vyšejšyja navučalnyja ŭstanovy Biełarusi.
U punkt rehistracyi abituryjentu nieabchodna źjavicca asabista, majučy pry sabie aryhinał dakumienta, jaki śviedčyć asobu. Takimi źjaŭlajucca pašpart, paśviedčańnie biežanca abo vid na žycharstva.
Centralizavanaje testavańnie budzie prachodzić z 12 pa 28 červienia pa 11 ahulnaadukacyjnych pradmietach. Pry hetym abituryjenty majuć prava zdać tolki try testy — pa ruskaj abo biełaruskaj movie i pa dvuch inšych pradmietach, jakija im nieabchodnyja dla pastupleńnia ŭ VNU. Dla abituryjentaŭ, jakija nie ŭziali ŭdzieł u centralizavanym testavańni pa ŭvažlivaj pryčynie ŭ asnoŭny dzień, ustanoŭleny reziervovy dzień — 4 lipienia.
Zhodna z praviłami pastupleńnia, pryjom dakumientaŭ u tak zvanyja siłavyja i tvorčyja VNU projdzie z 5 pa 16 lipienia. Va ŭsie inšyja dziaržaŭnyja i pryvatnyja VNU krainy (akramia zavočnaj i viačerniaj formy ŭ VNU sielskahaspadarčaha profilu) na ŭsie formy navučańnia pryjom dakumientaŭ budzie ažyćciaŭlacca z 12 pa 29 lipienia (na vajennyja fakultety — z 12 pa 26 lipienia).
Ciapier čytajuć
Z YouTube vydalili kanały BiełTA, STB i ANT. Ułady pahražajuć kontrmierami42
Kamientary