Jana prosić zabiaśpiečyć jaje kanstytucyjnyja pravy.
Maci pakaranaha za saŭdzieł u teraryźmie Uładzisłava Kavalova praciahvaje biespaśpiachova damahacca ad Kamiteta dziaržbiaśpieki infarmacyi pra los zapisaŭ syna, patrabujučy pieradačy joj ich, jak taho žadaŭ Uładzisłaŭ. Zaraz da hetaha jana maje namier padklučyć Hienieralnuju prakuraturu.
Jak paviedamiła Luboŭ Kavalova, 29 krasavika jana piśmova źviartałasia da načalnika SIZA KDB, sprabujučy vyśvietlić, dzie znachodziacca zapisy. Dvojčy — 4 červienia i 13 lipienia — da staršyni KDB Vadzima Zajcava. «Ni na adzin sa zvarotaŭ piśmovaha adkazu ja nie atrymała», — kanstatavała Kavalova.
Tamu 31 žniŭnia jana nakiravała zamoŭlenym listom skarhu na imia hienieralnaha prakurora Alaksandra Kaniuka, bo, pavodle słoŭ Kavalovaj, «u adpaviednaści z artykułam 125 Kanstytucyi hienprakuror ažyćciaŭlaje vyšejšy nahlad za vykanańniem zakonnaści ŭ krainie».
«Ja damahajusia vykanańnia ŭ adnosinach da mianie artykuła 40 Kanstytucyi. Jany pavinny davać mnie adkazy. Adnak hienierał Zajcaŭ ihnaruje Kanstytucyju. KDB u asobie Zajcava byŭ abaviazany razhledzieć moj zvarot i dać adkaz u termin. Navat admova ad razhladu zajavy pavinna być piśmova matyvavanaja», — zajaviła Kavalova.
U artykule 40 Kanstytucyi havorycca: «Kožny maje prava nakiroŭvać asabistyja ci kalektyŭnyja zvaroty ŭ dziaržaŭnyja orhany. Dziaržaŭnyja orhany, a taksama słužbovyja asoby abaviazany razhledzieć zvarot i dać adkaz pa sutnaści ŭ vyznačany zakonam termin. Admova ad razhladu padadzienaj zajavy pavinna być piśmova matyvavanaj».
«Zapisy syna, zroblenyja ŭ sudzie i padčas sustreč z advakatam, nie ŭtrymlivajuć dziaržaŭnaj tajny, jany byli abvieščany ŭ sudzie. Adnak žoŭtaja papka, u jakoj jany znachodzilisia, mnie była pieradadziena pustoj», — kanstatavała Kavalova.
Kamientary