Park avijacyi nie papaŭniaŭsia

Pres-słužba prezidenta i nacyjanalnaja avijakampanija «Biełavija» nie kamientujuć infarmacyju ab kupli Biełaruśsiu samalota Boeing-767-300ER byłoha prezidenta Turkmienistana Saparmurata Nijazava.

U pres-słužbie «Biełavija» paviedamili, što park hramadzianskaj avijacyi kampanii nie papaŭniaŭsia, a davać kamientary nakont prezidenckaha samalota nie mohuć, bo zajmajucca «vyklučna absłuhoŭvańniem hramadzianskich samalotaŭ».

Kiraŭnik pres-słužby prezidenta Biełarusi Pavieł Lohki skazaŭ BiełaPAN, što nie moža kamientavać hetuju infarmacyju, «bo pres-słužba nie maje nijakaha dačynieńnia da dziaržzakupak».

Infarmacyju ab tym, što «Biełavija» i Turkmenistan Airlines zaklučyli dahavor ab prodažy biełaruskamu boku byłoha va ŭžyvańni samalota Boeing-767-300ER raspaŭsiudziŭ 18 maja apazicyjny internet-resurs charter97.org sa spasyłkaj na svaje krynicy ŭ biełaruskaj avijakampanii.

Samalot ź sieryjnym zavodskim numaram 33968/926 raniej nasiŭ rehistracyjnyja znaki EZ-A700 i słužyŭ u jakaści pradstaŭničaha transpartu prezidenta Nijazava. Paśla jaho śmierci ŭ śniežni 2006 hoda pavietranaje sudna zastałosia va ŭradavym avijaatradzie Turkmienistana, adnak nastupny prezident Hurbanhuły Bierdymuchamiedaŭ na im nie lataŭ.

Damoŭlenaść ab kupli/prodažy samalota nibyta była dasiahnutaja padčas vizitu Bierdymuchamiedava ŭ Minsk, jaki adbyŭsia 27–28 krasavika.

Infarmacyja krynicy paćvierdziłasia i ŭ mižnarodnym avijacyjnym rejestry, dzie jość nastupny zapis: «Boeing 767-32K 33968 926 EW-001PB Belavia ferried 08 may 12 ASB-SAW, for VIP use ex EZ-A700». Jak vynikaje z zapisu, samalot nabyty mienavita dla pieravozki VIP-piersony i jamu prysvojeny rehistracyjnyja zanki EW-001PB.

Pieršy «Boinh» Łukašenki, 737-800BBJ u madyfikacyi Business Jet, maje rehistracyjny znak EW-001PA, jaki adroźnivajecca ŭsiaho na adnu litaru.

Jak adznačaje charter97.org, cana Boeing-767-300ER na mižnarodnym rynku składaje ad 124 da 160 miljonaŭ dołaraŭ u zaležnaści ad madyfikacyi. Adnak «Boinh» Nijazava byŭ ekskluziŭna vyrableny ŭ VIP-varyjancie: u adździełcy sałona prymieniena naturalnaja skura i kaštoŭnyja parody dreva, a santechnika ŭ dušavoj i prybiralniach vykanana z vykarystańniem kaštoŭnych mietałaŭ i kamianioŭ.

Akramia taho, samalot niabožčyka Turkmienbašy abstalavany ŭsimi viadomymi vidami ŭradavaj suviazi (u tym liku spadarožnikavaj), sistemaj praduchileńnia paražeńnia rakietami kłasa «ziamla-pavietra» i «pavietra-pavietra», a taksama zabiaśpiečany parašutnym abstalavańniem.

Pavodle źviestak charter97.org, ciapier kupleny samalot adpraŭleny na pierafarboŭku ŭ Frankfurt-na-Majnie.

• 0
• 0
• 0
• 0
• 0
• 0
• 0
• 0