Šeść biełarusak z troch krain rychtujucca pierapłyści Ła-Manš
Šeść biełarusak, jakija siońnia žyvuć u Litvie, ZŠA i Vialikabrytanii, rychtujucca da adnaho z samych składanych marafonaŭ na adkrytaj vadzie — zapłyvu praz Ła-Manš, jaki projdzie ŭ červieni. Kali im udasca heta zrabić, kamanda BelSwimSisters moža stać pieršaj biełaruskaj estafietnaj kamandaj, jakaja pieraadoleje hety maršrut.
Ideja, pišuć udzielnicy ŭ svaim akaŭncie, źjaviłasia paśla znajomstva ź litoŭskaj kamandaj płyŭcoŭ, jakaja ŭ 2025 hodzie pierapłyła Ła-Manš. Jany paznajomilisia praz sacyjalnyja sietki, a potym sustrelisia na adkrytych zapłyvach u Litvie.
U Ła-Manšy — pralivie pamiž Francyjaj i Vialikabrytanijaj — prachodzić adzin z samych viadomych marafonaŭ na adkrytaj vadzie. Daŭžynia maršrutu pa pramoj składaje kala 34 kiłamietraŭ, ale z ulikam marskich płyniaŭ płyŭcy časta pieraadolvajuć 40—60 km. Estafietny farmat praduhledžvaje, što ŭdzielnicy pa čarzie źmianiajuć adna adnu ŭ vadzie, a ahulnaja praciahłaść zapłyvu moža składać ad 10 da 16 hadzin.
Adna z hałoŭnych składanaściaŭ — tempieratura vady. Kali bolšaść spabornictvaŭ na adkrytaj vadzie prachodzić pry 21—24 hradusach, to ŭ Ła-Manšy naprykancy červienia vada trymajecca na ŭzroŭni 14—16°C. U takoj vadzie dychańnie stanovicca ciažkim, chutka mierznuć ruki i nohi, a praciahłaje znachodžańnie moža pryvieści da hipatermii.
Mienavita choład stanovicca hałoŭnaj pryčynaj, čamu mnohija nie dachodziać da finišu. Za stanam płyŭcoŭ sočać naziralniki na łodcy: kali temp ruchaŭ padaje i stanovicca vidavočna, što čałaviek pačynaje hublać siły ad choładu, jaho vymajuć z vady.
Tamu padrychtoŭka da zapłyvu ŭ pieršuju čarhu źviazanaja z pryvykańniem da chałodnaj vady. Jak raspaviadajuć udzielnicy ŭ svaim instahramie, treniroŭki prachodziać u samych roznych umovach — ad ledzianych azior u Litvie da zapłyvaŭ u akijanie.
Akramia hetaha, kamanda šmat płavaje i paasobku. U ahulnym čacie ŭdzielnicy staviać sabie mety na tydzień i dzielacca vynikami trenirovak. Jość i načnyja zapłyvy — start moža adbycca ŭ luby čas sutak, tamu treba być hatovym płyści i ŭ ciemry.
Jašče adna asablivaść adkrytaj vady — chvali i viecier. Płyni mohuć bić u tvar ź luboha boku, tamu płyŭcy vučacca dychać i naleva, i naprava. Dla mnohich heta jak navučycca pisać druhoj rukoj — patrabuje času i pierabudovy kaardynacyi.
Kamanda žyvie ŭ roznych krainach: try ŭdzielnicy ŭ Litvie, dźvie ŭ ZŠA i adna ŭ Vialikabrytanii. Kab padtrymlivać suviaź, jany rehularna sustrakajucca anłajn i abmiarkoŭvajuć jak treniroŭki, tak i arhanizacyjnyja pytańni.
Čas ad času atrymlivajecca źbiracca i asabista. Naprykład, sumiesnyja treniroŭki ŭžo prachodzili ŭ Atłantyčnym akijanie ŭ Ispanii. Takija sustrečy dapamahajuć nie tolki padrychtavacca fizična, ale i adčuć siabie sapraŭdnaj kamandaj.
Start zapłyvu adbyvajecca z boku Vialikabrytanii — takija praviły. Płyŭcy pavinny dakranucca da francuzskaha bieraha, paśla čaho viartajucca na łodku i iduć nazad u port Duŭr. Dakładnaje miesca finišu pradkazać składana: mocnyja płyni časta znosiać trajektoryju, tamu maršrut nahadvaje litaru S.
Udzielnicy biełaruskaj kamandy — Ullana Zarubina, Darja Śliž, Maryna Šynkarenka, Maryja Kolesava-Hudzilina, Nastaśsia Litvinienka, Alena Hryhorjeva.
Jany pišuć u sacsietkach, što ŭ kožnaj ź ich — svaja historyja i matyvacyja. Žančyny roznych prafiesij, ale ŭsich abjadnoŭvaje adna meta — pierapłyści Ła-Manš razam. Tym bolš zvaroty ŭ profilnyja asacyjacyi pakazali: čysta biełaruskaj estafietnaj kamandy na Ła-Manšy pakul nie było.
Kamanda viadzie staronku ŭ instahramie, dzie raskazvaje pra treniroŭki i kvalifikacyjnyja zapłyvy, a taksama pra toje, jak ich možna padtrymać.
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja7
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek44
Kamientary