«Praca dyscyplinuje». Byłych źniavolenych adpravili źbirać kamiani
U Mastoŭskim rajonie byłych źniavolenych centralizavana adpravili ŭ sielhaspradpryjemstva «Imia Adama Mickieviča» źbirać kamiani i prybirać fiermy. Milicyja nazyvaje heta «pieraasensavańniem pamyłak», a pravaabaroncy — parušeńniem pravoŭ čałavieka, piša Hrodno.Life.
U Mastoŭskim rajonie ludziej, jakija stajać na ŭliku ŭ kryminalna-vykanaŭčaj inśpiekcyi RAUS, nakiravali na pracy ŭ sielhaspradpryjemstva «Imia Adama Mickieviča», paviedamlaje UUS Hrodzienskaha abłvykankama. U aficyjnych paviedamleńniach ich nazyvajuć «padulikovymi»(«podučietnymi»).
Pavodle źviestak milicyi, ludzi zajmalisia ačystkaj paloŭ ad kamianioŭ — heta, jak śćviardžajecca, pavinna źnizić ryzyku pałomki techniki i pavysić uradžajnaść. Taksama ich pryciahvali da naviadzieńnia paradku na fiermie, dzie žyvuć cialaty.
Što kažuć u milicyi
Padobnyja «akcyi» pravodziacca rehularna. U viedamstvie ich padajuć jak elemient sacyjalizacyi: praca na ziamli, pavodle viersii pravaachoŭnikaŭ, pavinna spryjać «vypraŭleńniu» i viartańniu da narmalnaha žyćcia.
«Praca, u tym liku na śviežym pavietry i ŭ sielskaj miascovaści, dyscyplinuje čałavieka, daje mahčymaść pieraasensavać pamyłki minułaha i adčuć prynaležnaść da žyćcia rajona. Sa svajho boku pravaachoŭniki praciahnuć spryjać u pracaŭładkavańni i sacyjalizacyi hramadzian, jakija raniej astupilisia, aryjentujučy ich na pošuk stabilnaj krynicy dachodu, bo heta załoh zakonapasłuchmianaha ładu žyćcia», — upeŭnieny ŭ milicyi.
Pra toje, ci zapłacili ludziam za pracu, nie ŭdakładniajecca.
Što kažuć pravaabaroncy
Pravaabaroncy adnosiać takija pracy ŭ sielskaj haspadarcy da katehoryi prymusovaj pracy.
Praktyka mabilizacyi ludziej na abaviazkovyja pracy ŭ metach ekanamičnaha raźvićcia supiarečyć Kanviencyi MAP №105, jakaja zabaraniaje vykarystańnie prymusovaj pracy navat u vyklučnych vypadkach.
Mižnarodnyja struktury, uklučajučy orhany AAN, raniej krytykavali padobnyja praktyki, naprykład, u Turkmienistanie, dzie dziaržaŭnych słužboŭcaŭ, studentaŭ i rabotnikaŭ pryciahvajuć da sielhasprac pad pahrozaj sankcyj. U Biełarusi padobnuju rolu adyhryvajuć siezonnyja kampanii: viasnoj — zbor kamianioŭ z paloŭ, vosieńniu — zbor uradžaju.
Akramia ludziej, jakija znachodziacca na ŭliku, da takich prac u Biełarusi pryciahvajucca studenty, biudžetniki, vajskoŭcy i navat školniki.
Kamientary
«Arbeit macht frei»
Ahulnyja skrepy tatalitarnych režymaŭ XX stahodździa.