Jeŭrasajuz pašyryŭ čorny śpis na 29 kampanij i 12 asobaŭ
Adnosiny Biełarusi i ES nablizilisia da niebiaśpiečnaj rysy.
23 sakavika: palitviaźni siadziać, Jeŭrasajuz pašyryŭ svoj čorny śpis na 29 kampanij i 12 asobaŭ.Hetaje rašeńnie pryniała Rada ministraŭ zamiežnych spravaŭ ES siońnia. Jak možna mierkavać pa zajavach prezidentki Litvy Dali Hrybaŭskajcie, heta nie ekanamičnyja sankcyi, a prosta novyja abmiežavańni suprać łukašenkaŭskich čynoŭnikaŭ i biznesoŭcaŭ. Pavodle našaj infarmacyi,
na ćviordym padychodzie da Minska nastojvaje Hiermanija — kraina, jakaja maje hałoŭny hołas u vyznačeńni palityki ES na ŭschodzie.
U lik novych 12-ci asobaŭ u čornym śpisie ŭvachodziać sudździ, prakurory, jakija, pavodle ES, uciahnutyja ŭ represii ŭ Biełarusi, a biznesoŭcy, jakija spansarujuć Łukašenku abo źjaŭlajucca beneficyjarami ŭłady Łukašenki.
Novyja dadatki da vizavaha «čornaha śpisu» jašče nie apublikavanyja, adnak udzielniki pasiedžańnia paviedamili, što ŭ śpis trapili tolki 2 biznesoŭcy — Anatol Tarnaŭski i Juryj Čyž.U śpisie firmaŭ — kampanija Tarnaŭskaha «Juniviest-M», siarod astatnich — tyja, što naležać Čyžu i Piefcijevu. Adnak u śpis nie trapili kampanija Čyža, jakaja supracoŭnicaje sa Słavienijaj, i try kampanii, jakija majuć biznesovyja suviazi z Łatvijaj.
Miery biez nadziei
Ministr zamiežnych spraŭ Polščy Radasłaŭ Sikorski nie chavaje, što nie źviazvaje z novymi zachadami vialikich nadziejaŭ: "Heta vykazvańnie našaj salidarnaści ź biełaruskim hramadstvam i niehatyŭnaj acenki taho, što robiać ułady»,— cytuje Sikorskaha ahienctva PAP.
Polski ministr padkreśliŭ, što situacyja z pravami čałavieka ŭ Biełarusi horšaje: «Niekatoryja palityčnyja źniavolenyja znachodziacca na miažy śmierci. Heta nie moža być pakinuta biez adkazu».
Na minułym tydni pramilhnuła nadzieja, što Biełaruś admovicca ad palityki supraćstajańnia i kanfrantacyja asłabnie. Jeŭraparłamient musiŭ pryniać rezkuju rezalucyju pa Biełarusi. U tekście havaryłasia pra ekanamičnyja sankcyi i zaklik da admieny Čempijanatu śvietu pa chakiei ŭ Minsku. Viadoma, zajavy Jeŭraparłamienta majuć chutčej simvaličnaje značeńnie, ale jany taksama ŭpłyvajuć na dalejšyja rašeńni.
Dyk voś, rezalucyju nie pryniali.
Bałharski deputat Kryścijan Vihienin prapanavaŭ adkłaści jaje, kab dać mahčymaść Biełarusi vypravić situacyju. «My atrymali infarmacyju pra stanoŭčyja zruchi», — skazaŭ Vihienin.
Pasły nie viernucca?
Inšy pazityŭny sihnał byŭ dasłany z Brusela vusnami Ketryn Eštan. Kiraŭnička zamiežnaj palityki ES zaklikała pasłoŭ viarnucca ŭ Minsk na praciahu tydnia. Tym samym jana pakazała, što Jeŭropa nie zacikaŭlenaja ŭ pahłybleńni kanfliktu.
«Ab jakim viartańni jeŭrapiejskich pasłoŭ siońnia moža iści havorka, kali Jeŭrasajuz nie stamlajecca pahražać nam uviadzieńniem novych sankcyj 23 sakavika? Davajcie spačatku dačakajemsia hetaj daty, a ŭžo potym my budziem vyznačacca, u tym liku i adnosna viartańnia pasłoŭ», — takaja pazicyja biełaruskaha MZS.
Z hetaj nahody navat aniekdot źjaviŭsia. Pasły ES viernucca ŭ Minsku tolki pry vykanańni adnaho patrabavańnia: kab ich puścili.
Adnak ničoha hetaha nie zdaryłasia: paśla nie viarnulisia, palitviaźni siadziać, a z Administracyi prezidenta demanstratyŭna źlili papierku z paradkam dnia narady, na jakim pieršymi punktami razhladalisia zachady ŭ adkaz i tolki 4-m — zakulisnyja prapanovy Sikorskaha-Kulčyka.
Śpis załožnikaŭ
Puściać nazad u svaje rezidencyi pasłoŭ ci nie, pakul nie viadoma, a voś kanstytucyjnaje prava biełaruskich hramadzianaŭ ab svabodzie pieramiaščeńnia parušajecca. Užo ź dziasiatak palitykaŭ, žurnalistaŭ, pravaabaroncaŭ nie zmahli vyjechać ź Biełarusi.
Ich zdymajuć na miažy z rekamiendacyjaj źviarnucca ŭ Adździeł pa hramadzianstvu i mihracyi MUS pa miescy žycharstva. Aficyjnyja pryčyny hučać davoli śmiešna. Kahości nie puścili za miažu za «niajaŭku ŭ vajenkamat». Suprać staršyni Biełaruskaj asacyjacyi žurnalistaŭ nibyta pačataja sprava ab jaje bankructvie. A Anatol Labiedźka «ŭchilajecca ad abaviazkaŭ, nakładzienych na jaho sudom». «Stvorany śpis załožnikaŭ», — reziumuje Andrej Dyńko, šef-redaktar «Našaj Nivy», jaki taksama apynuŭsia ŭ śpisie nievyjaznych.
U intervju rasijskamu telekanału Russia Today Łukašenka nie tolki pryznaŭ isnavańnie čornaha śpisu, ale i paabiacaŭ jaho pašyreńnie.
Ad łabistaŭ nie adbicca
Jość imaviernaść, kali sankcyi buduć pryniatyja, to jany mohuć začapić ludziej, jakija skałacili za apošnija hady kapitał. Heta ŭładalnik «Trajpła», biarozaŭskich zavodaŭ i minskaha «Dynama» Juryj Čyž, kiraŭnik «Santa-Impeks Brest» i «Savuškavaha praduktu» Alaksandr Mašenski, staršynia «Amkadora» Alaksandr Šakucin, kiraŭnik «Tytuń-Inviesta» i ŭładalnika sietki hipiermarkietaŭ «Karona» Pavieł Tapuzidzis.
Pa nieaficyjnaj infarmacyi, biełaruskija ŭłady pastavili zamiežnych biźniesmienaŭ pierad faktam, što ŭ vypadku sankcyj suprać biełaruskich kaleh jany mohuć zharnuć svoj biznes u našaj krainie.Šerah litoŭskich palitykaŭ, što majuć biznes u Biełarusi, ciapier rašuča vystupajuć suprać novych sankcyj. Padobnyja nastroi jość u Łatvii i Słavienii.
«Vy nie pavierycie, kolki čałaviek zmahło siudy prabicca», — napisała bruselskaje vydańnie Euobserver ab łabistach biełaruskich biźniesmienaŭ, jakija dabivajucca nieŭklučeńnia ŭ śpis nieŭjaznych u ES.
Da ekanamičnych sankcyj niadaŭna zaklikaŭ eks-kandydat u prezidenty Dźmitryj Us. «Pierakanaŭča prašu vas prajavić mudraść, ćviordaść i rašučaść, kab dapamahčy vyratavać krainu ad dalejšaha padzieńnia», — napisaŭ Us da Ketryn Eštan.
Prašeńnie Sańnikava «razhladajecca»
Viadoma, što krokam dobraj voli z boku Minska mahło b stać vyzvaleńnie palitviaźniaŭ. Adnak
ułady ŭsiaho tolki paviedamili, što prašeńnie ab pamiłavańni Sańnikava i Bandarenki ŭsio jašče razhladajecca. Maŭlaŭ, była infarmacyja ab tym, što vybivałasia padpiska siłaj.
Takuju infarmacyju možna traktavać jak niejkuju «nažyŭku», na jakuju chočuć złavić jeŭrapiejcaŭ. Ničoha kankretnaha nie zroblena, ale namioki šmatabiacalnyja.
Adzinym pakul «pazityŭnym sihnałam» słužyć chiba dazvoł šeścia na Dzień Voli ad Akademii navuk da Banhałor. Letaś nie dazvolili i hetaha. Ciapier ža demanstrujuć, što hatovyja da mirnaha šeścia, biez razhonu i zatrymańniaŭ.
Adkłali na 2015
Łukašenka ž u čarhovy raz naviedaŭ Maskvu, dzie prachodziła pasiadžeńnie Miždziaržaŭnaj rady Jeŭrazijskaj ekanamičnaj supolnaści. Bakam tak i nie ŭdałosia damovicca ab padpisańni Jeŭrazijskaha sajuza, jaki vyrašyli adkłaści na 2015 hod.
Znoŭ vyjavilisia drobnyja supiarečnaści ŭ pazicyi Maskvy i Minska pa rearhanizacyi JeŭrAzES. Nie ŭdajecca Kramlu zavabić u Jeŭrazijski sajuz i Ukrainu, niahledziačy na vysokija ceny na haz i jeŭrapiejski kryzis.
«Moža, padyšach pamre, a moža, asioł zdochnie»
Što budzie aznačać dla dziaržaŭnaści, ekanomiki, kultury Biełarusi dalejšaja eskałacyja ź Jeŭrasajuzam? My paprasili prakamientavać heta analityka Alaksandra Kłaskoŭskaha.
«Ničoha dobraha. Adzinaje vyjście dla Łukašenki zastajecca iści na ŭschod, u pastku jeŭrazijskaj intehracyi.
Na Zachadzie harać masty, jakija padpaliŭ sam biełaruski kiraŭnik.Maskva ž budzie nastojliva patrabavać ad Biełarusi novych pradpryjemstvaŭ i adzinaj valuty».
Dahetul Łukašenka, było takoje ŭražańnie, naŭmysna abvastraje adnosiny ź Jeŭropaj, kab za hety košt stryhčy kupony ŭ Rasii. U vyniku
sprava zajšła tak daloka, što, kali, skažam, zaŭtra Maskva pačała b rabić ź Biełaruśsiu ŭsio, što zaŭhodna, Jeŭrasajuz prosta pramaŭčaŭ by.
Zastajecca adkrytym pytańniem, jakija zachady ŭ adkaz na rašeńnie ES ad 23 sakavika prymie Minsk.
Ciapier čytajuć
Łukašenka vykazaŭsia pra deficyt miedykaŭ i prapanavaŭ im pracavać bolš9
Kamientary