Praces zakryty. Spravu razhladaje sudździa Viarchoŭnaha sudu.
Były staršy lejtenant, supracoŭnik departamentu achovy MUS, 37‑hadovy Alaksandar Siarhiejčyk abvinavačvajecca ŭ dvaccaci dvuch złačynstvach — siarod ich dvanaccać zabojstvaŭ. Praces zakryty, spravu razhladaje sudździa Viarchoŭnaha Sudu Biełarusi.
Siońnia pobač z budynkam abłasnoha sudu ŭ Horadni ź dziaviataj ranicy byŭ pierakryty ruch aŭtamabilaŭ. Sud achoŭvali ŭzmocnienyja siły milicyi, u budynak prapuskali tolki tych, chto pakazvaŭ pozvy. Presu (navat dziaržaŭnuju) u zalu sudu nie dapuścili.
Alaksandar Siarhiejčyk byŭ aryštavany na pačatku hodu ŭ Horadni. Śledztva mieła nieabvieržnyja dokazy jahonaj datyčnaści da zabojstva dziaŭčyny ŭ mikrarajonie Dzieviatoŭka ŭ Horadni.
U vyniku śledčych dziejańniaŭ raskryli jašče adno zabojstva ź jahonym udziełam, a dalejšaja pravierka Siarhiejčyka vyjaviła niečakanyja vyniki: jon zabiŭ adzinaccać maładych žančyn i adnaho mužčynu. Hetyja złačynstvy byli ździejśnienyja ŭ 2000—2005 hadach u Horadni j Haradzienskim rajonie. Cieły zabitych znachodzili ŭ vakolicach Horadni i ŭ Niomanie.
Mnie ŭdałosia adšukać čałavieka, jaki pracavaŭ razam ź Siarhiejčykam u departamencie achovy MUS. Voś što zhadvaje Ryšard Daminiuk:
Daminiuk: «Nie mahu skazać, kab jon tady niejak drenna siabie pavodziŭ, ale niejkaja antypatyja da jaho była. Jon niejak staraŭsia trymacca ŭbaku, a ja ź im nie imknuŭsia naviazvać kantaktaŭ».
Słužbu ŭ departamencie achovy Siarhiejčyk pačynaŭ siaržantam. Paźniej skončyŭ na «vydatna» akademiju MUS i dasłužyŭsia da kamandzira roty ŭ zvańni staršaha lejtenanta. Jon žanaty j maje dvaich dziaciej.
Ryšard Daminiuk raspaviadaje, što ŭ toj čas u departament achovy traplali nie najlepšyja milicyjanty:
Daminiuk: «Kali ja pryjšoŭ pracavać u departament achovy — to heta naahuł, ličyłasia, adna z apošnich słužbaŭ, kudy, jak praviła, źbirali ŭsich parušalnikaŭ dyscypliny ci tych, chto nia vielmi zarekamendavaŭ siabie na słužbie».
Aproč zabojstvaŭ Alaksandra Siarhiejčyka vinavaciać jašče ŭ dziesiaci złačynstvach: kradziež i zachoŭvańnie zbroi, kradziež aŭtamabilaŭ dy inšaje. Kryminalnaja sprava naličvaje tryccać vosiem tamoŭ, u sud vyklikali kala sta śviedkaŭ.
Śledztva pravodzili supracoŭniki respublikanskaj prakuratury. Kompleksnaja psychalahična‑psychijatryčnaja ekspertyza pryznała abvinavačanaha zdarovym.
Ciapier čytajuć
Uvodziać adkaznaść za prapahandu homaseksualnaści, biaździetnaści, a taksama za niezakonnaje pradstaŭleńnie Biełarusi na mižnarodnaj arenie17
Kamientary