2011: Jak heta było, abo Chronika najbolš značnych padziej
21 studzienia Alaksandr Łukašenka ŭ čaćviorty raz aficyjna zastupiŭ na pasadu. Inaŭhuracyjny kartež prajechaŭ pa niezvyčajna pustych vulicach stalicy...
Studzień
21 studzienia Alaksandr Łukašenka ŭ čaćviorty raz aficyjna zastupiŭ na pasadu kiraŭnika krainy. Inaŭhuracyja prajšła na fonie niečuvanaj chvali represij, uźniataj u noč na 20 śniežnia 2010. Inaŭhuracyjny kartež prajechaŭ pa niezvyčajna pustych vulicach stalicy. Łukašenka pramaŭlaŭ padčas uračystaści asipłym hołasam, vyhladaŭ źniervavanym.
Pry kancy miesiaca Jeŭrasajuz uvioŭ vizavyja sankcyi ŭ dačynieńni da 158 biełaruskich čynoŭnikaŭ, u tym liku Łukašenki i jaho synoŭ Viktara i Dźmitryja. ZŠA ŭviali sankcyi ŭ dačynieńni da šerahu pramysłovych pradpryjemstvaŭ Biełarusi.
14 studzienia prezident Tunisa Bien Ali ŭ vyniku narodnych chvalavańniaŭ, jakija pačalisia ŭ śniežni, pakinuŭ krainu. Z Tunisa pačałasia «arabskaja viasna» — parad revalucyj, jakija pryviali da krušeńnia tyranijaŭ, što trymalisia dziasiatki hadoŭ.
Luty
Nacbank uvodzić novyja praviły nabyćcia bankami valuty — pieršaja łastaŭka valutnaha kryzisu, jaki nieŭzabavie abryniecca na krainu. Heta adbyvajecca na fonie imklivaha skaračeńnia zołatavalutnych reziervaŭ.
Z turmy KDB vychodzić były kandydat u prezidenty Aleś Michalevič, jaki nieŭzabavie robić zajavu pra katavańni ŭ SIZA.
Pieršy prysud za Płošču-2010 — Vasil Parfiankoŭ atrymlivaje 4 hady turmy strohaha režymu.
10 lutaha pad ciskam 18-dzionnych šmattysiačnych akcyj pratestu z pasady kiraŭnika Jehipta sychodzić Chośni Mubarak, jaki kiravaŭ krainaj 30 hadoŭ. Jaho žadańnie pieradać uładu ŭ krainie synu vyklikała vielizarnaje abureńnie ŭ hramadstvie. Najpierš siarod moładzi, jakaja za svajo žyćcio nie bačyła na palityčnaj scenie inšych lidaraŭ.
Padziei ŭ Tunisie i Jehipcie natchniajuć apazicyjanieraŭ u Livii, dzie pačynajucca masavyja demanstracyi.
Sakavik
Na hrodzienskaha žurnalista Andreja Pačobuta zaviali kryminalnuju spravu za abrazu Łukašenki. Paźniej jaho abvinavaciać jašče i ŭ paklopie, žurnalista aryštujuć da suda.
Praciahvajucca pracesy nad udzielnikami Płoščy.
U Biełarusi narastaje napružanaść na finansavym rynku. Banki pierastajuć vydavać kredyty, z abmieńnikaŭ u druhoj pałovie miesiaca źnikaje valuta.
23 sakavika ŭ Minsku prezientavali «haradskuju elektryčku». U chutkim časie jana źviaža stalicu z Zasłaŭjem i Rudzienskam.
11 sakavika ŭ Japonii adbyvajecca mahutny ziemlatrus. Jon pravakuje ŭtvareńnie cunami i pryvodzić da avaryi na AES «Fukusima». Japonija apynajecca na miažy technahiennaj katastrofy.
Krasavik
11 krasavika ŭ vyniku terakta na stancyi mietro «Kastryčnickaja» zahinuli 15 čałaviek, sotni atrymali ranieńni. Praź niekalki dzion śledstva zajavić pra zatrymańnie padazravanych. Imi apynucca prostyja rabočyja, 25-hadovyja Dźmitryj Kanavałaŭ i Uładzisłaŭ Kavaloŭ ź Viciebska.
Ministerstva infarmacyi inicyjavała sudovyja pracesy ab zakryćci niezaležnych haziet «Naša Niva» i «Narodnaja vola». Spravy byli raspačatyja na roznych padstavach, ale išli sinchronna, što vyhladała jak pomsta ŭłady hazietam za aśviatleńnie vybaraŭ 2010 h. i represij.
U abmieńnikach utvarajucca čerhi pa valutu, u jakich ludzi dniujuć i načujuć. Čutki pra devalvacyju macniejuć.
Maj
23 maja Nacbank pravioŭ 30-pracentnuju devalvacyju nacyjanalnaj valuty. Na toj momant u krainie faktyčna dziejničaŭ čorny rynak zamiežnaj valuty. Układčyki biełaruskich bankaŭ stracili kala $1,5 młrd na abiasceńvańni depazitaŭ.
U biełaruskich kramach apuścieli palicy. Źnikła bytavaja technika, mnohija charčovyja pradukty, miasa.
U Minsku asudzili anarchistaŭ za šerah akcyj, u tym liku napad na pasolstva Rasii i padpał budynka KDB u Babrujsku. Najbolš atrymaŭ Ihar Alinievič — 8 hadoŭ turmy.
2 maja hrupa amierykanskaha śpiecnaza na terytoryi Pakistana likvidavała Asamu bien Ładena. Paśla teraktaŭ 11 vieraśnia 2001 jaho nazvali terarystam №1.
Červień
7 červienia ŭ centry Minska prajšła maštabnaja akcyja «Stop bienzin!» Sotni aŭto zabłakavali praśpiekt Niezaležnaści na niekalki hadzin. Na nastupny dzień Łukašenka zahadaŭ źnizić canu na paliva.
12 červienia prymiežnyja handlary praviali stychijnuju akcyju pratestu ŭ Bruzhach i na Varšaŭskim moście. Ich aburyŭ zahad, jaki abmiežavaŭ vyvaz paliva za miažu.
U Minsku i abłasnych centrach pa sieradach pačynajucca «maŭklivyja akcyi».
Lipień
3 lipienia ŭ Minsku milicyja hvałtoŭna razahnała mirnuju akcyju pratestu na Pryvakzalnaj płoščy. Miescami asoby ŭ cyvilnym prymianiali suprać udzielnikaŭ akcyi i žurnalistaŭ bałončyki z hazam. Tolki ŭ Minsku zatrymali kala 200 čałaviek.
Ministerstva infarmacyi niečakana adklikała pazovy da «Našaj Nivy» i «Narodnaj voli».
Na 2-m rudaŭpraŭleńni «Bie-łaruśkalija» ŭ šachtu prarvałasia vada. Likvidacyja nastupstvaŭ avaryi zaniała niekalki miesiacaŭ, infarmacyju pra jaje pieršapačatkova zamoŭčvali.
22 lipienia ŭ Narviehii teraryst-adzinočka Anders Brejvik zładziŭ vybuch kala ŭradavych budynkaŭ. Zahinuli 8 čałaviek. Potym jon skiravaŭsia na vostraŭ Utoja, dzie rasstralaŭ 76 čałaviek, pieravažna moładzi, udzielnikaŭ letniaha palityčnaha łahiera.
Žnivień
4 žniŭnia ŭ Minsku aryštavany pravaabaronca Aleś Bialacki. Jaho abvinavacili ŭ niavypłacie padatkaŭ u asabliva bujnych pamierach. Jak stała viadoma paźniej, aficyjnyja instancyi Litvy vydali biełaruskamu KDK infarmacyju pra rachunki Bialackaha ŭ litoŭskich bankach, kudy pastupali hrošy dla dapamohi achviaram palityčnych represij.
Na svabodu vyjšli pieršyja palitviaźni, asudžanyja za Płošču-2010.
6 žniŭnia ŭ Łondanie ŭspychnuli masavyja biesparadki, jakija pierakinulisia na inšyja harady krainy. Pryčynaj stała śmierć 29-hadovaha hanhstara ŭ pierastrełcy z palicyjaj.
U Livii abrynuŭsia režym Muamara Kadafi. Dyktatar i jaho paplečniki syšli ŭ padpolle, hramadzianskaja vajna na hetym nie spyniłasia.
Vierasień
7 vieraśnia ŭ Rasii pad Jarasłaŭlem raźbiŭsia samalot Jak-42, u jakim lacieła miascovaja chakiejnaja kamanda. Zahinuli 44 čałavieki. U tym liku i biełarusy: Rusłan Salej, Siarhiej Astapčuk i Mikałaj Kryvanosaŭ.
14 vieraśnia Nacbank abviaściŭ «rynkavy kurs» dalara — 8000 rubloŭ. U abmieńnikach źjaviłasia valuta.
15 vieraśnia pačaŭsia adkryty sudovy praces pa spravie teraktu ŭ mietro.
U Rasii było pryniataje rašeńnie ab vyłučeńni kandydatam na prezidenckija vybary dziejnaha kiraŭnika ŭrada Uładzimira Pucina.
Kastryčnik
Apublikavany prajekt zakona «Ab orhanach dziaržaŭnaj biaśpieki» i źmieny ŭ Kryminalnym kodeksie. Zhodna ź imi KDB atrymaŭ našmat šyrejšyja paŭnamoctvy dla zdušeńnia palityčnych apanientaŭ.
Rost cenaŭ i padzieńnie zarobkaŭ vyklikali šerah zabastovak na pradpryjemstvach krainy. Adna ź ich prajšła ŭ Barysavie. Kala sotni pracaŭnikoŭ UP «Žyllo» dva dni nie vychodzili na pracu i damahlisia pavyšeńnia zarobkaŭ.
20 kastryčnika ŭ Livii ŭ pierastrełcy byŭ paranieny i potym schopleny Muamar Kadafi. Jon pamior ad ranaŭ, nie dajechaŭšy da balnicy.
Listapad
Łukašenka, Miadźviedzieŭ i Nazarbajeŭ padpisali dekłaracyju ab jeŭrazijskaj ekanamičnaj intehracyi.
«Biełtranshaz» kančatkova pierajšoŭ va ŭłasnaść Rasii. U abmien Biełaruś atrymała istotnyja źnižki cany na pryrodny haz.
9 listapada ŭ Biełarusi nabyć valutu stała mahčymym tolki pa pašparcie — kraina viarnułasia da praktyki 1997—2006.
30 listapada Viarchoŭny Sud pryhavaryŭ Dźmitryja Kanavałava i Uładzisłava Kavalova da śmiarotnaha pakarańnia.
Śniežań
Hadavina padziej 19 śniežnia 2010 hoda ŭ Minsku abiarnułasia zatrymańniami dziasiatkaŭ ludziej, jakija vyjšli na płoščy stalicy.
Aktyvistki ŭkrainskaha ruchu Femen zładzili pierformans z raździavańniem na prystupkach KDB u Minsku. Akcyja skončyłasia dla dziaŭčat vykradańniem i vyvazam na miažu z Ukrainaj. MUS, KDB i Pamiežny kamitet zajavili pra svaju niedatyčnaść da hetaha.
16 śniežnia ŭ kazachskim horadzie Žanaazen uspychnuli masavyja biesparadki. Palicyja i vojski razahnali akcyju pratestaŭ naftavikoŭ, jaki, pratestavali 7 miesiacaŭ. Pa aficyjnaj infarmacyi padčas razhonu zahinuli 13 čałaviek, pavodle nieaficyjnaj — da 70 čałaviek.
17 śniežnia pamierli były prezident Čechii Vacłaŭ Haveł i kiraŭnik Paŭnočnaj Karei Kim Ir Sen.
Amierykanski časopis Time nazvaŭ «čałaviekam hoda» abahuleny vobraz «Pratestoŭca» (The Protester). Mienavita jon — niezadavoleny ŭładaj čałaviek — sioleta najmacniej paŭpłyvaŭ na raźvićcio śvietu. Nikomu nie viadomyja ludzi damahlisia źviaržeńnia dyktataraŭ u Jehipcie, Livii i Jemienie, praciahvajuć baraćbu suprać ich u Siryi, Bachrejnie. 2011 hod adznačyŭsia masavymi pratestami i ŭ Biełarusi.
Ciapier čytajuć
Biełaruskaja i rasijskaja armii na biełaruskaj terytoryi trenirujucca nanosić jadzierny ŭdar8
Kamientary