Na čas etapavańnia advakat da Sańnikava dapuščany nie budzie

Iryna Chalip, žonka eks-kandydata ŭ prezidenty Andreja Sańnikava, 18 listapada znoŭ sustrełasia z časova vykonvajučym abaviazki načalnika departamienta vykanańnia pakarańniaŭ MUS Siarhiejem Pracenkam.

Jak paviedamiła Chalip, jana sprabavała vyśvietlić, čamu da jaje muža, jaki zaraz znachodzicca ŭ mahiloŭskaj turmie № 4 u čakańni etapu ŭ adnu z kałonij Viciebskaj vobłaści, nie dapuskajuć advakata.

«Ja była na pryjomie ŭ Pracenki. Jon mnie skazaŭ, što advakat da Sańnikava dapuščany nie budzie, tamu što moj muž — pierasylny, — paviedamiła Chalip. — Pierasylnyja ŭ nas, akazvajecca, nie majuć prava na jurydyčnuju dapamohu i abaronu. Aficyjna niadopusk advakata tłumačać tym, što na čas znachodžańnia tam u čakańni etapu asabistaja sprava nie adkryvajecca».

Jak miarkuje Chalip, hetaja situacyja demanstruje, što «niejkija ŭnutranyja instrukcyi parušajuć Kanstytucyju, i ŭsim na heta plavać».

Pavodle słoŭ Chalip, Pracenka joj taksama paviedamiŭ,

što ŭ novuju kałoniju Sańnikaŭ pavinien być dastaŭleny na nastupnym tydni, ale nie ŭdakładniŭ, kali mienavita.

Nahadajem, 16 listapada stała viadoma, što Sańnikava etapavali z babrujskaj kałonii. Kudy mienavita — nie paviedamili ni svajakam, ni advakatu. Chalip 17 listapada ŭdałosia trapić na pryjom da Siarhieja Pracenki, jaki paćvierdziŭ, što Sańnikava etapujuć u inšuju kałoniju ŭ suviazi z tym, što jamu nibyta pahražaje niebiaśpieka. Jon taksama paviedamiŭ, što palityka buduć etapavać praz mahiloŭskuju turmu ŭ Viciebskuju vobłaść. U jakoj mienavita kałonii Sańnikaŭ budzie adbyvać pakarańnie, Pracenka nie kankretyzavaŭ.

Maryna Kavaleŭskaja, advakat Sańnikava, padała skarhu va ŭpraŭleńnie departamienta vykanańnia pakarańniaŭ pa Mahiloŭskaj vobłaści na načalnika turmy № 4 Mahilova Alaksandra Łamazu, jaki admoviŭ joj u spatkańni z padabaronnym.

U dziejańniach načalnika turmy advakat bačyć parušeńnie kanstytucyjnaha prava Sańnikava na atrymańnie jurydyčnaj dapamohi ŭ luby čas, niezaležna ad taho źjaŭlajecca jon tranzitnym pierasylnym abo znachodzicca ŭ miescy źniavoleńnia.

Paśla naviedvańnia ŭpraŭleńnia DVP Maryna Kavaleŭskaja padała anałahičnuju skarhu ŭ abłasnuju prakuraturu.

Na terytoryi Viciebskaj vobłaści raźmieščanyja piać papraŭčych kałonij: № № 8 i 12 — u Oršy, № 3 — u Viciebskim rajonie, № 10 — u Navapołacku, № 3 — u Hłybokim.

• 0
• 0
• 0
• 0
• 0
• 0
• 0
• 0