Śviata ŭ Hancavičach — pohlad ź siaredziny

Hancavicki žurnalist Piotr Huzajeŭski piša pra «Dzień piśmienstva i druku» ŭ jahonym horadzie.

Upieršyniu ŭ historyi z časoŭ zasnavańnia horada ŭ Hancavičach ŭ hetyja vychadnyja adbudziecca respublikanskaje śviata. Napiaredadni pryjezdu šmatlikich haściej ź Biełarusi i inšych krain ŭ aŭralnym paradku budaŭniki, darožniki kamunalniki i rabotniki inšych pradpryjemstvaŭ i arhanizacyj zaviaršajuć raboty pa dobraŭparadkavańni horada.

Nazirajučy za hetaj honkaj na finišnaj pramoj, hancaŭčanie zakłapočany pytańniem — «Paśpiejuć ci nie?»

Za dva dni da śviata pracy jašče było šmat, ale kiraŭnictva spadziajecca, što da pryjezdu haściej asnoŭnyja raboty buduć zavieršany. Jak z žartam zaznačyŭ staršynia rajvykankama Uładzimir Stolar na rajonnaj naradzie rabotnikaŭ adukacyi 30 žniŭnia, im, jak studentam da ekzamiena, kab dobra padrychtavacca, nie chapaje ŭsiaho adnoj nočy.

A voś rabočyja byli nastrojeny nie tak aptymistyčna. «Kali ciap-lap, to, moža, i zrobim, ale potym treba budzie pierarablać, — skazaŭ adzin z rabočych, jakija pracavali kala kinateatra. — Kab dobra zrabić, jašče ź miesiac času patrebna».

Mnohija žychary horada taksama vykazvajuć sumnieńni, što ŭsio budzie daviedziena da ładu. «Oj, synki! Čamu ž vy raniej nie pačali?» — hledziačy na ruplivuju pracu, skazała piensijanierka z doma pa vuł. Kastryčnickaj Valancina Mikałajeŭna.

Na hetym tydni ŭsie pracujuć u takim tempie, što horad litaralna z ruin pieratvarajecca ŭ «lalku». Kab tak pracavali zaŭsiody, to kamunizm my, napeŭna, užo pabudavali b. Ale kali surjozna, to hetkaja śpieška nie maje ničoha ahulnaha ź jakaściu rabot: asfalt kłaŭsia ŭ łužyny, piešachodnyja darožki ŭ niekatorych miescach takija taniusieńkija, što vytryvajuć jaŭna niadoŭha, dy i tynkoŭka na niekatorych damach ŭžo advaliłasia, z-za čaho pryjšłosia budaŭnikam «lapić» jaje pa-novamu.

Na Kastryčnickaj vulicy horada ŭ čaćvier raboty kipieli. Budaŭniki śpiešna zaviaršali mantaž fantana kala byłoha kinateatra «Kastryčnik», jaki zaraz pieratvorycca ŭ Centr i budzie nazyvacca «Maładość». Praŭda, na niejki momant, pakul majstry pryklejvali litary, fotakamiera złaviła momant i jašče adnoj nazvy, kurjoznaj. Kali pačynali prymacoŭvać litary ad Centra na budynku, źjaviŭsia złaščasny nadpis — AD! Ale prachožyja i sami budaŭniki viesialilisia usiaho niekalki chvilin. Chutka «AD» pieratvaryŭsia ŭ pryhožuju nazvu — «Maładość».

Administracyi arhanizacyj i pradpryjemstvaŭ taksama nie zastajucca ŭ baku i asabista prymajuć udzieł: chto palivaje kvietki, chto raŭniaje kłumby, prybirajuć, padmiatajuć…

Raduje centr horada, asabliva park na vulicy Haharyna. Narešcie ŭ Hancavičach jość miesca, kudy možna pryjści pahulać ź dziećmi. Ale niekatoryja našy ludzi ŭsio-taki varvary: novieńkija łaŭki za niekalki dzion užo parezali, ranicaj usio zabrudžana łušpińniem ad siemak i plaškami ad piva i harełki.

I choć šmat davodzicca čuć niehatyvu, što padrychtoŭka da śviata – heta pakazucha, što takija śviaty dajuć mahčymaść niačystym na ruku čynoŭnikam nažycca i h.d., u dadzienym vypadku treba hladzieć na fakty, na toje, što karyści dla ludziej tut značna bolš, čym škody. I tym ludziam, jakija dabilisia, kab respublikanskaje śviata pravodziłasia mienavita ŭ Hancavičach, tym, chto pracavaŭ tydniami na dobraŭparadkavańni horada, treba vykazać udziačnaść. Bo dziakujučy hetamu, naš horad nabudzie sučasny vyhlad. Hałoŭnaje – zachavać usiu hetuju pryhažość, bo hości pryjeduć i pajeduć, a my tut zastaniemsia žyć.

Hancavičy za niekalki hadzin da śviatkavańnia. Videa Gantsevichi.info

• 0
• 0
• 0
• 0
• 0
• 0
• 0
• 0