Nie pasadzili! Andreju Pačobutu dali try hady z adterminoŭkaj i vypuścili ŭ zale suda

14:35

Ludzi skandujuć «Svabodu» i śpiavajuć «Sto lat».

Pačobut na voli

Andrej vyjšaŭ na hanak i trymaje na rukach syna Jarasłava, jakoha jon nie bačyŭ ad 6 krasavika. Aksana Pačobut płača.

Takim čynam Andrej Pačobut atrymaŭ try hady z adterminoŭkaj na dva hady pavodle artykuła «paklop na prezidenta». Pavodle artykuła «abraza» jon apraŭdany.

Andrej prakamientavaŭ siońniašni vyrak.

Jon zaznačyŭ, što nie čakaŭ takoha prysuda, a rychtavaŭsia da turemnaha terminu. Navat siońnia ranicaj jon rychtavaŭsia da horšaha i navat užo pačaŭ «zadumvacca», dzie budzie adbyvać termin. «Čamuści dumałasia pra Mahiloŭskuju vobłaść», — kaža Andrej. «I tolki kali padčas začytańnia prysudu prahučała słova «adterminoŭka», ja narešcie asensavaŭ prysud.

«Liču, što vyniesieny prysud - heta vynik cisku na režym Łukašenki, vynik uviadzieńnia ekanamičnych sankcyj u dačynieńni da režymu. Ja zaŭsiody byŭ prychilnikam taho,

kab u dačynieńni da dyktarskich režymaŭ pravodzić ćviorduju palityku, bo tolki ćviordaja pazicyja daje vynik".

Pačobut pierakanany, što sensam «takich aryštaŭ i takich kryminalnych spraŭ źjaŭlajecca šantaž». «Biezumoŭna, heta była niejkaja sproba šantažu ŭ dačynieńni da Polščy. Alaksandr Łukašenka vykarystaŭ mianie jak instrumient cisku.

Ja vielmi rady, što nijakich sastupak z hetaj nahody Łukašenka nie atrymaŭ», — padkreśliŭ žurnalist.

Andrej zaznačyŭ, što nie źbirajecca pakidać žurnalistyku,

budzie praciahvać svaju dziejnaść, u tym liku i hramadskuju, ale pakul choča adpačyć.

«Katavańniaŭ u turmie nie było», — skazaŭ jon. Taksama Andrej prakamientavaŭ siońniašni incydent, kali jon, idučy pad kanvojem, upaŭ. Andrej skazaŭ, što jamu tak załamali ruki ŭ kajdankach, što jon prosta pavaliŭsia.

Andrej zaznačyŭ, što nijakich natatak-uspaminaŭ u turmie nie vioŭ, bo bajaŭsia, što mohuć kanfiskavać. Ale kali redakcyja «Haziety Vyborčaj» paličyć mahčymym, skazaŭ jon, jon pastarajecca padrabiazna apisać trochmiesiačny pobyt u turmie.

Ludzi praciahvajuć fatahrafać Andreja fotaaparatami i mabilnikami. Narod pacichu razychodzicca. Milicyja taksama vielmi vietliva prapanuje razyścisia.

* * *

14:00

Žoncy Andreja Aksanie Pačobut zajavili, što na abviaščeńnie prysuda puściać 7 čałaviek. Biez žurnalistaŭ i biez fotakarespandentaŭ. Zaraz vyrašajecca, chto aproč svajakoŭ pojdzie ŭ zału suda. U zali suda było 15 śpiecnazaŭcaŭ.

10.40

Andrej viny nie pryznaŭ, paviedamlajuć reparciory NN z-pad budynku suda. Karespandent polskaj «Haziety vyborčaj» zajaviŭ, što nie pryznaje ni svajoj viny, ni hety sud. Pra heta im raskazaŭ advakat. Jon paviedamiŭ, što apošniaje słova Pačobuta było karotkim. Prysud budzie abvieščany ŭ 14:30.

Stała viadoma, što siońnia ŭ časie dastaŭki ŭ budynak suda Andrej Pačobut upaŭ pa vinie kanvairaŭ. Advakat zajaviŭ, što budzie rychtavać skarhu pa hetym fakcie.

* * *

5 lipienia, a 10-j hadzinie ŭ Hrodnie adnaviŭsia praces nad žurnalistam «Hazety vyborčaj» Andrejem Pačobutam. Papiarednie viadoma, što jamu pradastaviać apošniaje słova. Prakuror prapanavaŭ źniavolić žurnalista na try hady.

Praces pačaŭsia 14 červienia i prachodzić ź pierapynkami, jon nieadnarazova pieraryvaŭsia. Sud idzie ŭ zakrytym režymie, u zału suda nie puskajuć navat žonku z dačkoj i baćkoŭ Andreja.

Andrej abvinavačvajecca pavodle dvuch artykułaŭ Kryminalnaha kodeksu RB — 368 (častka I) — «abraza» i 367 (častka I) — «paklop» u adnosinach da Łukašenki.

* * *

Kryminalnaja sprava ŭ dačynieńni da žurnalista była zaviedziena 18 sakavika za artykuły ŭ polskaj «Gazeta Wyborcza», na sajcie «Biełorusskij partizan» i ŭ jahonym błohu. 6 krasavika Andrej byŭ aryštavany.

Pačobut śviadoma kinuŭ vyklik KDB. 8 studzienia žurnalistu vypisali aficyjnaje papiaredžańnie pra niedapuščalnaść supraćpraŭnych dziejańniaŭ (udzieł u niesankcyjanavanaj akcyi 19 śniežnia) za podpisam načalnika Upraŭleńnia KDB pa Hrodzienskaj vobłaści Ivana Karža.

Pačobut śćviardžaje, što pry hetym supracoŭniki hrodzienskaha KDB pahražali jamu i niekalki razoŭ ŭdaryli jaho pa hałavie. Jon padaŭ skarhu na dziejańni kadebistaŭ u vajskovuju prakuraturu. Vynikam nastojlivaści žurnalista stała sieryja pravierak i miedyčnych ekśpiertyz.

Adnačasova z žurnalistykaj, Andrej Pačobut zajmajecca i hramadskaj dziejnaściu: jon adzin ź lidaraŭ Sajuza palakaŭ. Pa adukacyi ž Pačobut — juryst, a taksama zajmajecca vyvučeńniem polskaha antysavieckaha ruchu ŭ Zachodniaj Biełarusi.

• 0
• 0
• 0
• 0
• 0
• 0
• 0
• 0