Niaklajeŭ prosić sud adklučyć rubilnik

«Takoje abvinavačańnie ni pry jakich umovach, ni za jakija «pasłableńni», «źmiakčeńni» ŭ prysudzie ja nie mahu pryznać i nie pryznaju».

Pakolki sam palityk znachodzicca pad «pilnym vokam» achranki z KDB, ranicaj heta zajavu ŭ Minski harsud adpraviła jahonaja žonka Volha Niaklajeva.

«Z prakuratury horada Minska mnie dasłany dakumient, u jakim paviedamlajecca, što kryminalnaja sprava № 11011110141, raspačataja ŭ dačynieńni da mianie pa č.1 art. 342 KK Respubliki Biełaruś, nakiravanaja ŭ Minski haradski sud dla vyznačeńnia terytaryjalnaj padsudnaści.

Śledstva pa spravie zavieršanaje. Niama čaho chavać u jaho «tajamnicach». U dadatku da dasłanych dakumientaŭ mnie rastłumačana, što ŭ adpaviednaści z art. 266 KPK Respubliki Biełaruś niepasredna ŭ Minski haradski sud ja pavinien źviartacca ciapier sa ŭsiakimi skarhami i chadajnictvami, što ja i rablu.

Abvinavačańnie, vystaŭlenaje mnie pa č. 1 artykuła 342 «za padrychtoŭku hrupavych dziejańniaŭ, jakija hruba parušajuć hramadski paradak», pahražaje pazbaŭleńniem voli na termin da 3 hadoŭ. U paraŭnańni z abvinavačańniem pa č.č. 1, 2 artykuła 293, jakoje vystaŭlałasia mnie raniej, jano značna miakčejšaje. Maksimalny termin źniavoleńnia źmienšany ŭ piać razoŭ — i možna było b skazać «dziakuj za łasku», kali b u «Pastanovie ab pieradačy kryminalnaj spravy prakuroru dla nakiravańnia ŭ sud» nie śćviardžałasia, što nie tolki ŭ «hrupavych dziejańniach, jakija hruba parušajuć hramadski paradak» , a naohuł u vybarach prezidenta Respubliki Biełaruś braŭ ja ŭdzieł «z metaj… uviadzieńnia z boku dziaržavaŭ Jeŭrapiejskaha sajuza, ZŠA i Rasijskaj Fiederacyi ekanamičnych i palityčnych sankcyjaŭ».

Takoje abvinavačańnie ni pry jakich umovach, ni za jakija «pasłableńni», «źmiakčeńni» ŭ prysudzie ja nie mahu pryznać i nie pryznaju.

Tut pierabłytanyja pryčyny sa vynikami. Nazvanyja sankcyi (kali naohuł možna nazvać ich sankcyjami) uviedzienyja zusim nie z pryčyny masavych biesparadkaŭ, jakich nie było. Jany ŭviedzienyja z pryčyny masavaha źbićcia mirnych hramadzian padraździaleńniami siłavych struktur, a taksama z pryčyny masavych aryštaŭ, da čaho ja nie maju nijakaha dačynieńnia. Nie ja zahadvaŭ źbivać ludziej i nie ja zahadvaŭ ich aryštoŭvać.

Mianie samoha ledź nie zabili. Za što?..

Niahledziačy na maje prośby i patrabavańni maich advakataŭ rasśledavać sprobu zamachu na majo žyćcio, ździejśnienaje 19 śniežnia 2010 u 19 hadzin 20 chvilin, kali ja mieŭ status kandydata ŭ prezidenty Respubliki Biełaruś i harantavanuju zakonam niedatykalnaść, hetaha nie zroblena. Ni ŭ kryminalnaj spravie № 10011110362, ni ŭ vyłučanaj ź jaho kryminalnaj spravie № 1101111014. Vinavatyja ŭ zamachu nie znojdzienyja, nie pakaranyja — i ništo nie pieraškadžaje im paŭtaryć sprobu. Tym samym parušanyja asnoŭnyja, dadzienyja mnie Kanstytucyjaj, harantyi dziaržavy na abaronu majho žyćcia, što zmušaje mianie vykazacca pa sutnaści abvinavačańnia.

Ja braŭ udzieł u prezidenckich vybarach nie z metami, prydumanymi ŭ abvinavačańni, a z adnoj-adzinaj metaj: stać prezidentam Respubliki Biełaruś. Heta nie złačynstva.

Dla taho kab vybary byli demakratyčnymi, svabodnymi i spraviadlivymi, ja pravioŭ napiaredadni ich hramadzianskuju kampaniju «Havary praŭdu!», jakoj maralna i materyjalna dapamahała jeŭrapiejskaja demakratyčnaja supolnaść. Heta taksama nie złačynstva. Jak i ŭsio astatniaje, što inkryminujecca mnie ŭ całkam nadumanym abvinavačańni, u jakim navat sproba zamachu na majo žyćcio ŭjaŭlajecca jak situacyja, u vyniku jakoj ja sam sabie nanios traŭmu. Ale navat takija «fantazii» — drobiaź u paraŭnańni z ahulnaj kancepcyjaj abvinavačańnia, ad jakoj patychaje ducham stalinskich časoŭ, kali ź biełaruskich paetaŭ lapili vobrazy vorahaŭ biełaruskaha naroda, polska-niamieckich špijonaŭ! Heta naŭprost abražaje mianie jak čałavieka, jak paeta, jaki ŭsio, što rabiŭ u žyćci, rabiŭ dla Biełarusi.

Na žal, damahčysia demakratyčnych vybaraŭ my nie zmahli. Jak zafiksavana ŭ zajavach alternatyŭnych kandydataŭ u prezidenty, padadzienych u CVK, a taksama ŭ zajavach misii karotkaterminovych naziralnikaŭ ABSIE i PA ABSIE i doŭhaterminovaj misii pa nazirańni za vybarami BDIPČ ABSIE, prezidenckija vybary ŭ Biełarusi prajšli i nie volna, i nie spraviadliva. Byli sfalsifikavanyja. Voś heta — złačynstva. Kab publična zajavić ab im, ja, jak adzin z kandydataŭ u prezidenty, zaklikaŭ maich prychilnikaŭ na Kastryčnickuju płošču horada Minska, dzie tradycyjna, jak jano było i ŭ 2001, i ŭ 2006 hadach, źbirajucca hramadzianie ŭ dzień vybaraŭ. Prava na svabodu mitynhaŭ, demanstracyj i šeściaŭ harantavanaje hramadzianam Respubliki Biełaruś Kanstytucyjaj — i jaho nielha skasavać pastanovami viedamstvaŭ, a tym bolš nielha zabaranić skarystacca hetym kanstytucyjnym pravam u dni, vyznačalnyja dla budučyni dziaržavy i naroda.

Akramia prava, jakoje harantuje mnie Kanstytucyja, ja abaronieny ad pieraśledu za zaklik na Płošču artykułam 36 KK Respubliki Biełaruś. Maje dziejańni całkam padpadajuć pad pałažeńni hetaha artykuła.

Praź mienšaje parušeńnie (administracyjnaje: udzieł u niesankcyjanavanym mierapryjemstvie) ja sprabavaŭ pieraduchilić parušeńnie bolšaje (kryminalnaje: pryznańnie spraviadlivymi niespraviadlivych vybaraŭ).

Heta sproba (asabliva vidavočnaja na fonie vybuchu ŭ mietro) pierakłaści vinu za paharšeńnie ŭzroŭniu žyćcia z ułady na apazicyju. U duchu stalinskich časoŭ — na vorahaŭ. Na piaćdziasiat tysiač «admarozkaŭ i adščapiencaŭ», jakija vyjšli na Płošču.

Kab nie było nijakaj niebiaśpieki dla ludziej, ja publična i piśmova prasiŭ pasadziejničać u padtrymańni paradku na Płoščy ministra ŭnutranych spravaŭ i staršyniu Kamiteta dziaržaŭnaj biaśpieki. Ale nichto mianie, kandydata ŭ prezidenty, i hramadzian, jakija išli sa mnoj, nie abaraniŭ navat u samym pačatku ruchu na Płošču, kali na vulicy Kalektarnaj na kałonu kampanii «Havary praŭdu!» napali ludzi ŭ formie biez apaznavalnych znakaŭ.

Čamu napali?.. Heta nie tolki majo pytańnie jak paciarpiełaha, na jakoje ja maju prava patrabavać adkazu. Heta klučavoje pytańnie dla vyśviatleńnia taho, što nasamreč adbyłosia ŭ dzień prezidenckich vybaraŭ u Biełarusi.

Na praciahu ŭsioj vybarčaj kampanii ja paŭtaraŭ, jak malitvu, adno i toje ž: «Nie moža być u biełaruskim hramadstvie nieprymirymaha supraćstajańnia! Jak my ŭvajšli ŭ siońniašniuju situacyju praz vybary — tak praz vybary nam ź jaje i vychodzić». Takaja pazicyja i, jak vynik jaje, mirny scenar mitynhu na Płoščy kahości nie zadavalniali. Ci nie heta pryčyna, ź jakoj mianie «niejtralizavali»? Kali heta nie tak, to treba dakazać, što nie tak. Kali pryčyny inšyja, to nieabchodna vyśvietlić: jakija? Bo heta sapraŭdnaje, a nie prydumanaje złačynstva. Pravakacyja, jakaja zrabiłasia «spuskavym kručkom», detanataram vybuchu hvałtu na Płoščy, pra što jość śviedčańni i ŭ materyjałach kryminalnaj spravy. Da prykładu, pakazańni staršyni partyi «Spraviadlivy śviet» S. I. Kalakina: «Bolšaść ludziej, pryblizna dźvie traciny z tych, chto pryjšoŭ na płošču Niezaležnaści, pryjšli tudy, tamu što ich aburyła źbićcio Uładzimira Niaklajeva». Jak pakazvajuć śviedki, paśla hetaj pravakacyi Płošča źmianiłasia kolkasna i jakasna: stała bolš šmatlikaj i bolš aktyŭnaj, mienš kiravanaj. Chiba nie hetaha i damahalisia arhanizatary napadu na kałonu hramadzianskaj kampanii «Havary praŭdu!» na vulicy Kalektarnaj?..

Kali pravakacyja rychtavałasia zahadzia i da jaje datyčnyja siły, zdolnyja arhanizavać śpiechrupu, jakaja z užyvańniem śpiecsrodkaŭ «niejtralizuje» kandydata ŭ prezidenty Respubliki Biełaruś, to ciažka śćviardžać, što ja zmoh by nie dapuścić padziej, jakija pryviali da vidavočnych niehatyŭnych nastupstvaŭ, palityčnych i ekanamičnych. Ale ja zrabiŭ by ŭsio, kab ich pieraduchilić, i kali za niešta i možna mianie sudzić, to chiba što za toje, što nie dajšoŭ da Płoščy. Tolki ŭ takim vypadku pavinnyja paŭstać pierad sudom i tyja, chto nie daŭ mnie da Płoščy dajści.

Usie my pierš za ŭsio hramadzianie našaj krainy, a potym užo paety ci prezidenty, sudździ abo padsudnyja. Usie my razumiejem: tyja, chto 19 śniežnia pryjšoŭ na Płošču, kab vykazać svaju niazhodu ź niespraviadlivaściu i niesvabodaj, — nijakija nie złačyncy, a najlepšyja syny i dočki Biełarusi, jakija prajavili svaju hramadzianskuju mužnaść. Naščadki jašče skažuć im dziakuj za heta.

Najbližejšymi dniami śpis niespraviadliva źniavolenych moža papoŭnicca novymi, nie vinavatymi ni ŭ jakich złačynstvach, ludźmi:

Prašu Minski haradski sud pryznać zaviedzienuju ŭ dačynieńni da mianie kryminalnuju spravu palityčna matyvavanaj i spynić jaje praz adsutnaść u maich dziejańniach, jak i ŭ dziejańniach inšych kandydataŭ u prezidenty i ŭsich udzielnikaŭ Płoščy, jakija padvierhlisia kryminalnamu pieraśledu, składu złačynstva. Tolki takoje rašeńnie moža pryvieści nas da zhody i pamiž saboj, i z našymi susiedziami.

Urešcie tak jano i budzie. Ja prosta prapanuju nie tracić času.

Uładzimir Niaklajeŭ».

• 0
• 0
• 0
• 0
• 0
• 0
• 0
• 0