Humavaja zaściaroha nie ŭratuje ad prancaŭ i hierpiesu

Niahledziačy na toje, što siońnia bolšaść mužčyn ličać siabie vydatna daśviedčanymi va ŭsim, što datyčyć seksualnych znosinaŭ, pytańniaŭ pa vykarystańni preziervatyvaŭ zastajecca mnostva.

Preziervatyŭ «nie prapuskaje» ŚNID!

Isnuje mierkavańnie, što preziervatyŭ nie abaraniaje ad VIČ-infiekcyi, tamu vykarystoŭvać jaho «marna». Hetaja pamyłka, chutčej za ŭsio, źviazanaja z tym, što preziervatyŭ sapraŭdy nie zdolny abaranić ad połavych infiekcyj, jakija zakranajuć skuru, — hierpies, sifilis, łabkovy piedykuloz i inš, bo jon pakryvaje nie ŭsiu pavierchniu pałavoha orhana i nie moža całkam vyklučyć kantakt skury. Miž tym prancy, vošy, miakki šankr, hienitalny hierpies, vostrakancovyja kandyłomy, kantahijozny malusk i inšyja takija paskudstva abžyvajuć taksama skuru čałavieka ŭ zonach, jakija kandom nie abaraniaje. Dyj na ślizistaj rota jany zachoŭvajucca i množacca.

Adnak što da infiekcyj, jakija pieradajucca praz vadkaści (kroŭ, śpiermu, vahinalnyja vydzialeńni), to tut preziervatyŭ źjaŭlajecca nadziejnym srodkam abarony, bo pory łateksa našmat mienšyja, čym malekuły taho ž VIČ. Naturalna z ahavorkaj, što preziervatyŭ nie paškodžany i vykarystoŭvajecca pravilna.

Firma harantuje…

Preziervatyvy viadomych handlovych marak prachodziać šmatstupienny kantrol jakaści (u adpaviednaści ź mižnarodnymi standartami ISO), uklučajučy elektronny. Na hetym etapie adbrakoŭvajucca vyraby, jakija majuć razryvy, adtuliny, mikrapaškodžańni. «Humavy vyrab» prachodzić nastupnyja pravierki:

— test na razryŭ — pry hetym z preziervatyva vysiakajecca kalco, jakoje pavolna raściahvajecca, pakul nie razarviecca;

— test na abjom — preziervatyŭ napaŭniajecca pavietram da momantu razryvu;

— test na hiermietyčnaść — preziervatyŭ napaŭniajuć vadoj dla vyjaŭleńnia pracioku.

Pry takoj sistemie pravierki pracent brakavanaści vielmi nizki.

Pravilnaje zachoŭvańnie — harantyja pośpiechu

Pry vysokaj ci nizkaj tempieratury, jaje pierapadach, traplańni na ŭpakoŭku naŭprostych soniečnych pramianioŭ i h.d. łateks hublaje svaje pieršapačatkovyja ŭłaścivaści. Heta ž adbyvajecca pa zakančeńni terminu prydatnaści preziervatyva.

Tamu, kab zaścierahčy siabie, nabyvajcie preziervatyvy tolki viadomych handlovych marak i ŭ miescach, jakija majuć adpaviednyja ŭmovy zachoŭvańnia (apteki, supiermarkiety, kramy pry aŭtazapraŭkach). Toje samaje datyčyć vykarystańnia preziervatyvaŭ, jakija niekalki miesiacaŭ zachoŭvalisia ŭ aŭtamabilnym «bardačku», bo roźnica tempieratur tam moža dasiahać 40 i bolš hradusaŭ (zimoj i letam). Łateks — materyjał tryvały, ale pry niapravilnym zachoŭvańni — vielmi dalikatny!

Vučycca zaŭsiody varta

Značny pracent paškodžańniaŭ preziervatyva adbyvajecca z pryčyny jaho niapravilnaha ci nieaściarožnaha vykarystańnia, naprykład, kali preziervatyŭ nadziavajecca paśla pačatku pałavoha aktu abo zdymajecca da jaho zakančeńnia, časam preziervatyŭ nadziavajuć navyvarat, upakoŭku adkryvajuć zubami, padčas nadziavańnia nie pakidajecca «reziervuar» dla śpiermy, u kaho-niebudź z partnioraŭ zrobleny intymny pirsinh i h.d.

Alerhija na łateks — nie pryčyna nie zaścierahacca

Łateks źjaŭlajecca samym raspaŭsiudžanym materyjałam dla vyrabu preziervatyvaŭ, adnak preziervatyvy taksama vyrablajucca z poliŭretanu abo poliizaprenu (sintetyčnaha łateksu). Hetyja materyjały nie źmiaščajuć białku, jaki prysutničaje ŭ naturalnym łateksie i źjaŭlajecca pryčynaj uźniknieńnia alerhii.

Akramia taho, z pryčyny niekatorych asablivaściaŭ mnohija ludzi addajuć pieravahu poliŭretanavym preziervatyvam: poliŭretan tančejšy za łateks, što robić jaho mienš zaŭvažnym padčas vykarystańnia, lepš pravodzić ciapło, tamu bolš ustojlivy da vonkavych uździejańniaŭ, nie maje charakternaha pachu, a taksama moža vykarystoŭvacca sa zmazkami na alejnaj asnovie.

Darečy, pra zmazki

Isnuje mierkavańnie, što preziervatyvy i roznyja intymnyja hieli niesumiaščalnyja. Heta nie tak. Adzinaje što łateksny preziervatyŭ nie pieranosić susiedstva šmaravidłaŭ na alejnaj asnovie i pačynaje paprostu… rastvaracca. Tak što abaviazkova treba pahladzieć skład hielu, i kali jon vodny ci silikonavy — śmieła raznastaić seksualnaje žyćcio!

U Savieckim Sajuzie varyjantaŭ było niašmat

U SSSR, pavodle raspaŭsiudžanaj dumki, preziervatyŭ nazyvaŭsia «humavym vyrabam numar dva». Vyrabam numar adzin nazyvalisia supraćhazy. Usiaho isnavała try typapamiery preziervatyvaŭ: № 1 — najmienšy, № 2 — siaredni, № 3 — vialiki. Najbolš raspaŭsiudžanym byŭ pamier № 2. I inšyja typapamiery nie zaŭsiody byli ŭ prodažy. Cikava, što «vyraby numar adzin» u pradukcyi zavoda taksama mieli niekalki typapamieraŭ častak tvaru (tak zvanych «rostaŭ»), jakija adpaviadali peŭnym anatamičnym pamieram hałavy čałavieka.

Z čaho rabili preziervatyvy našy prodki?

Mužčynskija preziervatyvy ŭžyvalisia jašče ŭ Staražytnym Jehipcie i Hrecyi. Z čaho ich tolki nie rabili — z kišak, mačavoha puchira i škuraŭ roznych žyvioł. U Staražytnym Rymie nie hrebavali preziervatyvami ź ciahlic pieramožanych vorahaŭ… U Kitai jany rabilisia z našmaravanaj alejem šaŭkovaj papiery. U Japonii — z čarapašynaha pancyra abo rahoŭ (!) žyvioł. U Jeŭropie ŭ chod išoŭ lon, ale ŭsio-tki najbolš papularnymi byli baranavyja i aviečyja kiški. Revalucyju ŭ vytvorčaści načepnikaŭ zrabiła vynachodnictva pracesu vułkanizacyi humy ŭ XIX stahodździ.

Kantrolnaja zakupka

Pierad tym jak kuplać preziervatyvy, uvažliva vyvučycie ŭpakoŭku: ci jość na joj nieabchodnaja markiroŭka (łot, numar partyi), ci nie minuŭ termin prydatnaści, ci niama śladoŭ ŭskryvańnia. Vielmi aściarožna staŭciesia da pakupki «humatechničnych vyrabaŭ» u šapikach, pałatkach, na rynkach. Nie zabyvajcie pra pamier. Što b ni pisali vytvorcy, «svoj» pamier možna padabrać tolki ekśpierymientalnym šlacham. Kali vyrab zamały, značyć ź vialikaj dolaj imaviernaści parviecca ŭ samy adkazny momant. Kali zavialiki — moža ŭ toj ža samy momant «pakinuć daručanuju pasadu».

Biaśpiečny seks pačynajecca z… hałavy

Pierš čym kinuć upakoŭku preziervatyvaŭ «na ŭsialaki vypadak» u bardačok abo aptečku svajho aŭtamabila, padumajcie, što tam joj nie miesca. I nie tamu, što moža znajści žonka. A tamu, što tut bolš čym mahčymy razburalny dla łateksu pierapad tempieraturaŭ. Taksama nie kładzicie ŭpakoŭku na padvakońnie, tamu što tam mahčymaje doŭhaje ŭździejańnie naŭprostych soniečnych promniaŭ.

I nie treba nadziavać «dla lepšaj abarony» dva preziervatyvy adnačasova. Takaja pierastrachoŭka nie tolki nieefiektyŭnaja, ale i moža pryvieści da razryvu preziervatyvaŭ z pryčyny padvyšanaha treńnia. A kali vy nastolki baiciesia svaju partniorku, dyk, moža, i nie treba rabić heta mienavita ź joj, ha?.. Padumajcie!

• 1
• 0
• 0
• 0
• 0
• 0
• 0
• 0